DILI, 30 marsu 2021 (TATOLI)—Eletricidade de Timor-Leste, Empreza Públika (EDTL, E.P.) no Timor GAP, E.P selebra ona kontratu ba fornesimentu kombustível ba Sentral Elétrika Betano hamutuk lote tolu, hahú tinan 2021 to’o 2023.
Selebrasaun kontratu hala’o, hafoin prosesu negosiasaun ne’ebé lori tempu lubuk ida entre empreza estatál rua ne’e, ne’ebé haktuir iha Dekretu Lei númeru 61/2020, loron 25 novembru, fornesimentu kombustível ba EDTL.
“Dekretu Lei ne’e fó biban ba Timor GAP atu fornese serbisu refere,” relata nota imprensa ne’ebé Agência TATOLI asesu, iha tersa ne’e.
Notísia relevante: Timor GAP kontaktu kompañia hitu sai parseiru fornese mina EDTL
Ho selebrasaun kontratu ne’e, marka tan pasu importante ba empresa estatal rua, tanba foin dahuluk serbisu hamutuk hodi asegura enerjia eletrisidade ba nasaun.
Akordu ne’e asina hosi Prezidente Konsellu Administrasaun EDTL, E.P, Paulo da Silva, no Prezidente Konsellu Administrasaun Timor GAP, E.P, António de Sousa, no asiste hosi ekipa jestaun no apoiu legál instituisaun rua ne’e.
Iha loron 30 setembru, Konsellu Ministru aprova alterasaun projetu dekretu-lei kona-ba partisipasaun Timor GAP fornese kombustível ba EDTL, nune’e permite fornesimentu nesesáriu no asegura funsionamentu sentru produsaun eletrisidade.
Aleinde ne’e, Timor GAP mós komunika ona ho empreza hitu hosi Singapura, Malázia, no Taiwan hodi envolve iha prosesu fornesimentu kombustível.
Jornalista: Antónia Gusmão
Editora: Julia Chatarina