Xefe Suku Dato Tolu, João Agustinho Resi. Imajen Tatoli/Celestina Teles

COVALIMA, 22 juñu 2021 (Tatoli) –Abitante hamutuk 1.625 ne’ebé horik iha Suku Dato Tolu, Postu Administrativu Fohorem,  Munisípiu Covalima, la asesu eletrisidade.

Notísia Relevante : Ekipa MAPKOMS fó formasaun citizen journalism ba joven-sira

“Ami nia suku ida ne’e to’o ohin loron la asesu ba eletrisidade, tanba ne’e ami nia komunidade kontinua moris iha nakukun laran,” Xefe Suku Dato Tolu, João Agustinho Resi, informa ba Agência Tatoli iha Suku Dato Tolu, tersa ne’e

Komunidade iha Suku Dato Tolu balun uza deit solar panel no balun uza de’it lampu tradisionál (mina-rai). Tanba ne’e difikulta tebes komunidade atu asesu ba informasaun no estudante-sira atu hola parte iha ensinu aprendizajen online.

Durante ne’e, Xefe Suku João Agostinho Resi, hato’o beibeik ona proposta ba munisípiu to’o nasionál, maibé to’o agora seidauk iha resposta pozitivu.

Suku Dato Tolu iha aldeia tolu, hanesan Fatuk Kabuar Kraik, Fatuk Kabuar Leten ho Natardik.

Poténsia turizmu no agrikultura

Suku Dato Tolu, hanesan área iha poténsia tebes iha agrikultura ho ninia variedade hanesan kami, kafé no koto.

Xefe Suku ne’e hateten poténsia agríkola-sira ne’e nia folin maka ladún di’ak, nune’e la motiva komunidade agrikultór atu badinas hasa’e produsaun.

Suku Dato Tolu mós poténsia iha área turizmu, liuliu nia paizajen natureza no lagoa ho fatin istóriku balun.

Agrikultór André Barreto. Imajen Tatoli/Celestina Teles

Agrikultór André Barreto, hateten maske Suku Dato iha potensialidade iha agrikultura no turizmu, maibé sei abandonadu tanba seidauk iha atensaun hosi Governu atu arrola no jere ho didi’ak poténsia sira-ne’e.

“Ami iha koto, kafé no kami, maibé ami nia difikuldade maka merkadu ne’ebé la fó folin di’ak ba ami nia poténsia agríkola sira ne’e,” André Barreto hateten.

Jornalista      : Celestina Teles 

Editór             : Francisco Simões

HAKEREK NO HATÁN

Please enter your comment!
Please enter your name here