Imajen/google

COVALIMA, 22 juñu 2021 (TATOLI) –  Ekipa Ministériu Asuntu Parlamentár no Komunikasaun Sosiál (MAPKOMS) fó formasaun citizen journalism ba juventude-sira iha Suku Dato Tolu, Postu Administrativu Fohorem, Munisípiu Covalima.

Formasaun ne’e  MAPKOMS liuhosi Diresaun Nasionál Diseminasaun Informasaun hala’o durante loron-tolu, hahú hosi tersa ne’e no termina iha kinta (24/06).

Materia formasaun maka hanesan ezekusaun fundu transferénsia, jestaun sentru informasaun ho citizen journalism.

Citizen journalism katak atividade partisipativu hosi komunidade ba halibur, haklaken no informa situasaun ruma ba públiku liuhosi meiu komunikasaun sosiál ka fasilidade komunikasaun ne’ebé eziste.

Citizen journalism, komunidade la’ós sai konsumen mídia, maibé hola parte iha prosesu elaborasaun kona-bá hato’o informasaun ne’e rasik ba públiku.

“Ha’u hanoin ida ne’e formasaun báziku ba joven-sira, nune’e sira bele uza ekipamentu ne’ebé hodi halo serbisu citizen journalism nian,” xefe ekipa MAPKOMS,  Phinto Alves Gonzaga,  esplika.

Iha tinan kotuk, MAPKOMS  fó  apoiu  ba joven-sira ekipamentu ba joven-sira atu hala’o funsaun jornalizmu nian, maka  hanesan kamera, laptop  no komputadór.

Xefe Suku Dato, João Agustinho Resi dehan  programa ida ne’e di’ak tanba  fó benefísiu ba joven sira iha suku, liuliu ba juventude-sira iha suku izoladu hodi oinsá sira bele hatene oinsá maka fahe informasaun ba públiku ho meiu ne’ebé iha.

Total joven-sira ne’ebé hola parte iha formasaun ne’e  na’in-20 kompostu hosi  mane na’in-12  no feto na’in-ualu (8).

Jornalista       : Celestina Teles 

Editór             : Francisco Simões

HAKEREK NO HATÁN

Please enter your comment!
Please enter your name here