Prezidente Institutu Nasionál Seguransa Sosiál (INSS) Longuinhos Armando Leite. Imajen Tatoli/Nelson de Sousa.

DILI, 15 juñu 2021 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, informa INSS halo ona verifikasaun ba ona dadus entidade empregadór no fakultativu ba programa “Apoiu ba Empregu” hamutuk 5.516.

Notísia Relevante: INSS verifika ona dadus entidade empregadór-fakultativu 6.707

“Dadus ne’ebé tama ona iha INSS hamutuk 8.845. Hosi dadus 8.845 ne’e 5.516 mak ita verifika ona no restu 3.339 ne’e sei prosesu hela,” Prezidente INSS ne’e hateten ba Agência TATOLI, iha nia knaar fatin, Caicoli, Dili, tersa ne’e.

Dadus entidade empregadór no fakultativu 8.845 ne’e, halibur hosi entidade sira-ne’ebé rejistu iha MSSI iha munisípiu 12 inklui Rejiaun Administrativa Espesiál Oé-Cusse Ambeno (RAEOA).

Bainhira dadus restu hamutuk 3.339 ne’e verifika hotu ona mak INSS sei halo pedidu ba Banku Nasionál Komérsiu Timor-Leste (BNCTL) atu deside oinsá halo pagamentu.

Tuir nia, ida-ne’e ba entidade empregadór no fakultativu ne’ebé atu adere ba seguransa sosiál ne’e. Maibé ba sira-ne’ebé mak adere nanis ona iha seguransa sosiál ne’e, INSS kontinua loke no simu sira to’o fulan juñu ne’e nia rohan.

Ba hirak ne’ebé atu mai rejistu iha INSS karik, Prezidente INSS ne’e apela atu kumpre nafatin medida prevensaun COVID-19 hodi uza máskara, fase liman ho sabaun no kumpre distansiamentu sosiál no fíziku.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here