Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 21 juñu 2021 (TATOLI)—Sekretariadu Tékniku Administrasaun Eleitorál (STAE) sei halo resensiamentu ba kartaun eleitorál ho eletrónika liuhosi sistema biométriku iha tinan 2022.

Ministru Administrasaun Eatatál, Miguel Pereira de Carvalho, esplika resensiamentu biométriku ne’e Governu hakarak introdús ona iha baze dadus ne’ebé foin mak inísia iha 2019 no 2020 hahú estudu hamutuk ho UNDP.

Notísia Relevante: Kartaun eleitóral eletróniku biométriku iha faze preparasaun

“Ami iha ona rekomendasaun hosi UNDP no Governu pretende STAE sei halo resensiamentu biomtétriku ne’e iha tempu tuirmai ka iha 2022,” Ministru Administrasaun Estatal informa liuhosi debate faze jeneralidade ba pakote eleitorál tolu, iha uma fukun, segunda ne’e.

Iha resensiamentu biométriku sei rejista informasaun biométriku tantu liman, matan, oin no seluk tán maibé aban bainhira sistema biométriku ne’e iha ona mak sei define filafali dadus resensiamentu eleitorál biométriku ho nia espesifikasaun sira.

“Agora daudaun saida mak hateten iha-ne’ebá katak dadus iha lei ne’e ita temi jéneriku de’it, la temi ho detallu tanba planu ne’e bá-oin hodi halo resensiamentu biométriku,” nia dehan.

Entretantu Eis Vise-Ministru Administrasaun Eatatál no Eis Diretór Jerál STAE, Tomás do Rosário Cabral, aprezenta paresér ida ba Komisaun A, katak dadus biométriku ne’ebé STAE sei uza atu halo identifikasaun ba eleitór sira.

“Bainhira ita ko’alia kona-ba dadus biométriku, iha dadus biométriku barak atu identifika ema-ida nia isin bele uza hanesan: impresaun dijitál, rekoñesimentu ba matan (matan-fuan, ninia retina ka iris), jeomteria liman nian, rekoñesimentu ba ita-nia oin, rekoñesimentu ba ita-nia lian no seluk tán. STAE sei uza dadus biométriku ida-ne’ebé loos tanba agora STAE uza hela de’it impresaun dijitál,” Eis Diretór Jerál STAE nia  komentáriu ba proposta-alterasaun ba lei resensiamentu eleitorál ne’ebé previstu iha artigu 13 númeru 1 alínea k.

Notísia Relevante: Timor-Leste presiza sistema biométriku di’ak iha futuru

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here