Diretór Jerál STAE, Acilino Manuel Branco. Imajen/Espesiál

DILI, 19 abril 2021 (TATOLI)—Diretór Jerál Sekretariadu Téknika Administrasaun Eleitórál (STAE), Acilino Manuel Branco, hateten kartaun eleitorál eletróniku biométriku ne’e sei iha faze preparasaun ba estudu viabilidade no posibilidade eleisaun parlamentár bele uza ona kartaun ne’e.

“Tinan ida-ne’e finaliza estudu viabilidade ba preparasaun kartaun eleitórál eletóniku biométriku no tempu badak preparasaun ne’e bele hotu. Pelumenus ramata eleisaun prezidénsiál, ita bele hakat ba resensiamentu kartaun eleitorál eletóniku biométriku no ita bele implementa iha eleisaun parlamentar,” Acilino Manuel Branco hateten ba jornalista sira, hafoin partisipa asina dokumentu ba projetu “COVID-Resilient Elections in Timor-Leste” (CORE-TL), iha salaun VIP MAE, Colmera, Dili, segunda ne’e.

Kartaun eleitorál eleróniku biométriku ne’e bele implementa iha eleisaun parlamentár ho objetivu atu bele troka kartaun eleitorál tuan, tanba kartaun ne’e seguru liu no sei introdús hodi bele utiliza eletrónikamente ba prosesu eleitorál no eleisaun.

“Aban bainrua, iha ona kartaun eleitorál eletóniku biométriku, bainhira iha eleisaun ne’e la presiza uza lista votante maibé leno de’it ba sistema dadus sira,” nia dehan.

Intensaun hosi implementa kartaun eleitorál eletróniku biométriku ne’e atu bele garante di’ak liután kartaun eleitorál ne’ebé kualidade liu no baze dadus ne’ebé seguru para bele hasoru eleisaun sira iha futuru.

Kona-ba orsamentu ba kartaun biométriku, nia hatán, sei gastu tokon $3 ka $4 no bazea ba lei resensiamentu eleitorál ne’e bele mós halo iha rai-laran no rai-liur, entaun kustu operasionál ba rai-li’ur mós bele implika tanba númeru eleitorál atuál ne’e hamutuk rihun 830-resin.

“Mínimu ita uza tokon $3 ka $4 mak hodi bele implementa kartaun eleitorál eletróniku biométriku ne’e. Maibé, daudaun ne’e ita sei faze preparasaun hele, nune’e bainhira to’o tempu, ita hatene montante sertu ba karatun eleitorál eletróniku biométriku ne’e,” nia dehan.

Jornalista: Osória Marques

Editór: Cancio Ximenes 

HAKEREK NO HATÁN

Please enter your comment!
Please enter your name here