Udan boot iha loron 04 Abril 2021, rezulta uma barak iha Aldeia Moris Fatun Tasi Tolu inundasaun.Imajen/Tatoli/Eugénio Pereira.

DILI, 16 juñu 2021 (TATOLI)—Sekretária Estadu Protesaun Sivíl (SEPS), oferese ona materiál konstrusaun ba família hamutuk 1.083 iha munisípiu Dili, ne’ebé afetadu ba dezastre naturál iha 04 abríl.

“Iha prosesu distribuisaun, ita fó ona materiál konstrusaun ba família 1.083 iha Dili,” Diretór Nasionál Jestaun Risku Dezastre, Agostinho Cosme Belo, hateten ba jornalista Agência Tatoli via whatsApp, kuarta ne’e.

Notísia relevante:SEPS kontinua verifika dadus ba apoiu materiál konstrusaun

Tuir dadus hosi Diresaun Jestaun Risku Dezastre, verifika ona família 3.350 iha Dili mak presiza hetan apoiu materiál konstrusaun, tanba uma hetan estragu durante inundasaun.

Deskrisaun ba númeru ne’e, postu administrativu Na’in-Feto iha família afetadu 323 ho kategoria uma estragu aat totál 44, aat natón 131, aat kamán 148, ne’ebé simu ona apoiu 21 no 302 mak seidauk simu.

Postu administrativu Dom Aleixo iha família afetadu 1.799 ho kategoria uma estragu aat totál 743, aat natón 569, aat kamán 486 no simu ona apoiu 788 no seidauk simu hamtuk 1.011.

Postu administrativu Cristo Rei iha família afetadu 662 ho kategoria estragu totál 232, aat natón 260, aat kamán 169 no simu ona apoiu 37 no 625 seidauk simu.

Postu administrativu Vera Cruz iha família afetadu 416 ho kategoria uma estragu totál 48, aat natón 165, aat kamán 203 no simu ona apoiu 221 no 195 seidauk simu.

Postu administrativu Metinaro iha família afetadu 128 ho kategoria uma estragu totál 25, aat natón 13, aat kamán 90 no hosi númeru ne’e seidauk simu apoiu.

Postu administrativu Ataúro iha família afetadu 16 ho kategoria uma estragu totál iha rua, aat natón haat, aat kamán sanulu, simu hotu ona apoiu.

Pakote materiál konstrusaun ba kada vítima ne’ebé uma hetan estragu totál simu kalén-uma 0.30m tahan 50, pregu kalén 2kg, pregu 12cm 2kg, pregu 10cm 2kg, pregu 7 cm 4kg, besi betón 10mm 12 barra, besi betón 8mm 10 barra, arrame finu rolu rua ho semente tonasa 40 kg saka 25, no mós osan mão de obra $356 hodi selu bada’en.

Sira ne’ebé kategoria aat natón sei simu kalén ho pregu no osan $356, aat kamán sei simu kalén ho pregu kalén no osan $150.

Iha distribuisaun, SEPS oferese uluk materiál konstrusaun no osan mão de obra vítima-sira sei hein prosesu tuir-mai mak simu, tanba sei hetan aprovasaun.

Agostinho Cosme Belo, rekoñes katak, inundasaun ne’ebé akontese iha 04 abríl, família barak mak sofre liu-liu  iha Dili, tanba estraga uma no sasán inklui balun lakon vida.

Tanba ne’e, nia dehan, papél protesaun sivíl maka, hafoin dezastre halo kedan intervensaun hodi fó apoiu umanitáriu no rekoperasaun.

Ho distribuisaun materiál ne’ebé iha Agostinho Cosme Belo, hein katak família vítima ne’ebé uma hetan estragu bele rekonstrui fila-fali, liu-liu sira ne’ebé la’ós hela iha fatin risku ba dezastre.

SEPS iha prosedimentu ba apoiu materiál konstrusaun, ne’ebé oras-ne’e fó apoiu uluk ba família-sira ne’ebé la’ós hela iha fatin risku dezastre, no sira ne’ebé hela iha fatin risku hanesan mota ninin, foho lolon ho lagoa ninin, seidauk bele fó tanba hein planu Governu ba re-alozamentu.

SEPS mós halo akordu  ho família ne’ebé simu ona materiál konstrusaun atu bele utiliza ba re-konstrusaun no bandu labele faan tutan.

SEPS iha ninia ekipa monitorizasaun, koordena ho autoridade lokál ne’ebé sei tun fila-fali ba terrenu atu bele monitoriza katak, apoiu ne’ebé Governu fó, komunidade utiliza duni ba rekonstrusaun uma.

Tuir dadus hosi SEPS, to’o kuarta (16/06/21) iha família 157  ho ema 813 mak kontinua hela iha sentru akollamentu ativu neen iha Dili, hanesan Dom Bosco Comoro, Asrama Canossiana Hera, Igreja parókia Hera, sede suku Manleuana, eis restaurante Metiaut ho rate-ain Canossa kotuk.

Dadus hosi Ministéiru Administrasaun Estatál (MAE), identifika katak, iha Dili família 2.558 mak hela iha fatin risku ba dezastre naturál, hanesan mota ninin, foho lolon no lagoa ninin.

Antes ne’e, Sekretáriu Estadu Terras no Proriedade (SETP), Mário Ximenes, hateten identifika ona rai iha fatin tolu hodi prepara ba planu re-alozamentu ba família iha Dili ne’ebé hela iha fatin risku.

Fatin tolu ne’e mak hanesan Bekudu ho Tibar nu’udár rai Estadu no ida iha Hera área Hali-dolár ba parte foho hun nu’udár rai privadu ne’ebé Estadu presiza hola.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here