Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 21 juñu 2021 (TATOLI)—Polísia Nasionál Timor Leste (PNTL), munisípiu Dili, buka-tuir hela autór ne’ebé envolve iha kazu tuda-rahun komunidade missionáriu Societas Verbi Divini (SVD) iha Kuluhun, Dili.

Komandante Polísia munisípiu Dili, Superintendente Xefe, Henrique da Costa, hateten PNTL eskuadra Cristo Rei, orienta ona Serbisu Informasaun Polísia (SIP) no Konsellu Polisiamentu Komunitária (KPK) Polisia Unidade Fronteira (UPF) koordena ho autoridadade sira atu buka-tuir suspeitu hirak ne’ebé envolve iha kazu ne’e.

Notísia relevante:Jogu entre Portugál-Alemaña, polísia halo apreensaun ba motór 146

“Parte SIP kontinua rekolla informasaun no buka-tuir autór-sira ne’ebé envolve iha saun tuda-malu iha tempu ne’ebá,” Superintendente Xefe, Henrique da Costa hateten ba jornalista-sira iha Komandu PNTL Caicoli, segunda ne’e.

Henrique da Costa, esplika konflitu tuda-malu entre grupu joven ne’ebé akontese iha Domingu (20/06) tuku 05:00 madrugada, bainhira jogu tasa Euro la’o hela entre nasaun Portugál ho Alemaña, iha suku Kuluhun, postu administrativu Cristo Rei, munisipiu Dili, rezulta uma komunidade Padre SVD-sira nian hetan estragu grave.

Komandante ne’e kondena hahalok ne’e katak, tuir loloos labele akontese, tanba estraga uma Misionáriu sira nian iha rai ne’e.

Ho situasaun ne’e maka, PNTL sei envolve Batalliaun Orden Públiku (BOP), Unidade Polísia Maritima (UPM) atu asegura jogu tuir-mai, hodi garante Dili hakmatek.

Nune’e mós Padre José Taiçain, SVD lamente tebes ho aktu krime ne’ebé akontese, no husu ba PNTL atu investiga kazu ne’e hodi evita konfrontu labele akontese iha futuru.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here