Kandidatu PA Munisípiu Dili, Guilhermina F.S. Ribeiro. Imajen Tatoli/dok

DILI, 21 juñu 2021 (TATOLI)-Rezultadu teste eskrita ba kandidatu Prezidente Autoridade Munisipál Dili, konklui ona no hatudu katak Guilhermina Filomena Saldanha, hetan valor di’ak liu (13.6) tanba resposta loos ba pergunta hamutuk 68.

Notísia Relevante : Semana oin, konsellu konsultivu sei halo apresiasaun ba kandidatu PAM Dili

Kandidatu sira seluk, kompostu hosi Abílio Mesquita “Mausoko”, António Moniz Calau hetan valór hanesan 13.2 no lvete de Fátima Sarmento de Oliveira, fó resposta loos ba pergunta hamutuk 66. Nune’e, kandidatu Sabino da Costa hetan valór 11.8 tanba fó resposta loos ba pergunta hamutuk 59 no kandidatu Manuel da Silva hetan valór 10 tanba fó resposta loos ba pergunta 50.

Prezidente Autoridade Munisípiu Dili, Gaspar Soares. Imajen Tatoli/Arminda Fonseca

Ba rezultadu sira-ne’e, atuál Prezidente Autoridade Munisípiu (PAM) Dili, Gaspar Soares, segunda ne’e, iha salaun Ministériu Solidariedade, Sosiál no Inkluzaun (MSSI), hala’o enkontru nivel Konsellu Konsultivu Munisipál Dili hodi halo apresiasaun ba lista kandidatura na’in-neen (6) ne’ebé kompete ba Prezidente Autoridade Munisípiu Dili.

Iha inísiu kandidatu Prezidente Autoridade Munisípiu Dili iha na’in-hitu (7), maibé na’in-ida eskluidu tanba la prienxe rekizitu. Nune’e, hela na’in-neen, maka hanesan Guilhermina Filomena Saldanha, Abílio Mesquita “Mausoko”, António Moniz Calau, lvete de Fátima Sarmento de Oliveira ho Sabino da Costa.

“Tuir lei kandidatu sira ne’e tenke hetan apresiasaun hosi Konsellu Konsultivu Munisipál ninian molok naran sira-ne’e lori ba Governu Sentrál,” Prezidente Autoridade Munisípiu (PAM) Dili, Gaspar Soares , esplika ba  Agência Tatoli perante enkontru Konsellu Konsultivu Munisipál Dili.

“Ha’u hanoin hosi kandidatu-sira ne’ebé daudaun tuir hela prosesu atu troka ha’u ne’e, mesak di’ak de’it, ne’ebé ohin ha’u mai aprezenta ba Konsellu Konsultivu Munisipál, hetan tiha apresiasaun no tuir prosedimentu tarde liu loron-lima ha’u aprezenta ba Governu Sentrál, mak hafoin Governu Sentrál lori ba Konsellu Ministru aprova tuir lei ne’ebé iha, sé mak atu sai prezidente foun PAM Dili nian,” Gaspar Soares esplika.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here