Vise-Ministru Administrasaun Estatal, Lino de Jesus Torezao. Imajen/Antonia Maia Gusmao.

DILI, 17 juñu 2021 (TATOLI)—Vise Ministru Administrasaun Estatál (MAE), Lino de Jesus Torrezão, hateten semena oin konsellu konsultivu munisipál sei halo apresiasaun ba kandidatu Prezidente Autoridade Munisípiu Dili hodi submete ba Konsellu Ministru.

Notísia Relevante: Konsellu konsultivu munisípál seidauk halo apresiasaun ba kandidatu PAM Dili

“Semana oin Konsellu Konsultivu sei halo apresiasaun ba ita-nia kandidatu Prezidente Autoridade Munisípiu Dili nian, tanba durante Estadu Emerjénsia ne’e Governu aplika serka sanitária no konfinamentu obrigatóriu entaun ita labele realiza. Maibé, parese semana oin sei realiza, nune’e fó apresiasaun ba kandidatu sira-ne’e,” Lino de Jesus Torrezão hateten ba Agência TATOLI, liuhosi telefónika, kinta ne’e.

Governante ne’e haruka ona karta ba Prezidente Autoridade Munisípiu Dili (PAM), nune’e Konsellu konsultivu munisipál halo preperasaun atu halo apresiasaun ba kandidatu sira-ne’ebé liu ona selesaun eskrita.

“Foin lalais ne’e, ha’u haruka ona karta ba Prezidente Autoridade Munisípiu Dili, nune’e nia bele halo preparasaun ba Konsellu Konsultivu,” nia dehan.

Tanba, nia dehan, daudaun ne’e MAE sei haree no atende hela komunidade nia ezijénsia kona-ba ai-han ba ema kbiit laek ne’ebé hela iha aldeia sira.

Bainhira ramata ona programa atribuisaun ai-han ba komunidade kbiit laek sira-ne’e, parese sei deside no realiza enkontru ho konsellu konsultivu iha semana oin hodi halo apresiasaun ba kandidatu sira.

Antes ne’e, kandidatu Prezidente Autoridade Munisipál Dili nian hanesan Guilhermina Filomena Saldanha liu ona iha selesaun eskrita ho valór ezame klasifikasaun kuantitativa 13.6 tanba resposta loos ba pergunta hamutuk 68.

Enkuantu kandidatu sira seluk kompostu hosi Abilio Mesquita “Mausoko”, António Moniz Calau hetan valór hanesan 13.2 no Ivete de Fátima Sarmento de Oliveira, fó resposta loos ba pergunta hamutuk 66.

Nune’e mós, kandidatu Sabino da Costa hetan valór 11.8 tanba fó resposta loos ba pergunta hamutuk 59 no kandidatu Manuel da Silva hetan valór 10 tanba fó resposta loos ba pergunta 50.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here