Komandante DNTSR, Superintendente, João dos Reis Belo. Imajen Tatoli/Eugénio Pereira.

DILI, 18 juñu 2021 (TATOLI)—Komandu Jerál, Polísia Nasionál Timor-Leste (PNTL), hatún ona orden ba Diresaun Nasionál Tránzitu no Seguransa Rodoviária (DNTSR) ho Komandu munisípiu Dili atu kontrola adepu Timoroan-sira, labele halo konvoi durante jogu tasa Euro, liuliu jogu entre nasaun Portugál kontra Alemaña iha domingu (10/6), tuku 01.00 madrugada oras Timor-nian.

Komandante DNTSR, Superintendente, João dos Reis Belo, informa PNTL sei halo pasa revista makaas iha kapitál Dili, hodi kontrola kualkér abitante, labele halo konvoi hodi respeita ema seluk nia liberdade uzu estrada públiku.

Notísia relevante:PNTL halo apreensaun ba motór adeptu Portugál 47

“Apela ba adeptu-sira, durante jogu entre Portugál kontra Alemaña, ita la admite adeptu-sira atu halo kovoi hodi respeita lei kódigu estrada. Ami observa katak, adeptu-sira viola lei Tránzitu, no bele lori perigu hodi hamosu asidente. Ita sei halo pasa revista, se mak konvoi sei halo apreensaun no dokumentu la kompletu sei simu billete hodi selu infrasaun,” Superintendente João Belo, hateten ba jornalista-sira iha Komandu Jerál PNTL, Caicoli, sesta ne’e.

Membru DNTSR no PNTL Tránzitu Dili ho apoiu hosi Bataliaun Orden Públiku (BOP), sei asegura no sei  halo pasa revista iha área importante-sira hanesan, Palásiu Governu, Becora, Kuluhun, Taibesi, Balide, Vila-Verde, Colmera, Fatuhada, Rotunda Nicolau Lobato Comoro to’o Tasi-tolu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here