Ministru Edukasaun Joventude no Desporto (MEJD), Armindo Maia, hala’o lansamentu website iha Eskola Sekundáriu Jerál Públiku (ESJP) Suai, sábadu (19/06/21). Imajen Tatoli/Celestina Teles.

COVALIMA, 19 juñu 2021 (TATOLI)—Ministru Edukasaun Joventude no Desporto (MEJD), Armindo Maia, halo lansamentu website iha Eskola Sekundáriu Jerál Públiku (ESJP) Suai.

Armindo Maia, fó parabens ba eskola ne’e tanba iha ona mudansa, hodi hamosu ka kria ninia website rasik atu bele publika informasaun, liuliu atividade eskolár.

Notísia relevante:Presiza reabilita irrigasaun-sira iha Covalima

“Ha’u fó parabéns tanba tinan kotuk ha’u mai vizita, agrora iha mudansa,” Armindo Maia, hateten ba jornalista-sira iha ESJP, Suai, sábadu ne’e.

Governante ne’e subliña, edukasaun nu’udár responsabilidade ema hotu-nian, nune’e husu atu ba oin presija envolve kontribuisaun inan-aman sira hodi tulun hadi’a kualidade ne’ebé di’ak liu.

Iha fatin haesan Diretór eskola, Francelino Freitas Carvalho, hateten objetivu loloos hamosu website ne’e atu fó-sai informasaun kona-bá atividade iha eskola ne’e.

Tanba ne’e, Francelino Freitas Carvalho agradese ba MEJD ne’ebé lansa ona, no hein katak, meiu ida ne’e sei tulun duni parte eskola atu bele fó-sai buat ne’ebé bele ajuda estudante sira.

Nia dehan, estabelesimentu website ne’e tanba hetan kontribuisaun hosi inan-aman $2.500, hodi halo instalasaun internet no Rádiu CovaTaroman mak fó formasaun jornalizmu báziku ba estadante na’in-10 hodi halo jestaun ba website ne’e.

MEJD sei konstrui sala-de-aula tolu

Hafoin lansamentu ba website, Armindo Maia mós atualiza katak, MEJD sei ezekuta planu ba konstrusaun eskola iha territóriu tomak, ne’ebé eskola ne’e sei hetan konstrusaun  sala-de-aula tolu inklui haris-fatin.

Planu konstrusaun ne’e tama iha pakote Orsamentu Jerál Estadu (OJE) 2021, ne’ebé aloka ba MEJD no tuir planu sei implementa bainhira TL livre hosi transmisaun COVID-19.

Tanba ne’e, nia apela ba estudante-sira atu simu vasina, nune’e kontribui ba prevensaun transmisaun surtu COVID-19, nune’e iha tempu badak bele reativa hikas prosesu aprendizazen eskolár iha territóriu tomak.

Jornalista: Celestina Teles 

Editór: Cipriano Colo

HAKEREK NO HATÁN

Please enter your comment!
Please enter your name here