Forum Sosiedade Sivíl ho empreza estatál; BTL no EDTL halo diálogu kona-bá impaktu Covid-19 no inundasaun ba setór infraestrutura báziku iha salaun CNE, Dili, sesta (18/06/2021). Imajen Tatoli/Francisco Sony

DILI, 18 juñu 2021 (TATOLI)-Rede Sosiedade Sivíl ne’ebé organiza hosi Forum Organizasaun Naun Governamentál Timor-Leste (FONGTIL), sesta ne’e, diálogu ho empreza estatál rua; Bee Timor-Leste, Empreza Publiku (BTL,EP) ho Eletrisidade Timor-Leste, Empreza Públiku (EDTL,EP) hodi buka solusaun ba impaktu COVID-19  no inundasaun, 04 abríl liubá, ne’ebé rezulta infraestrutura báziku barak at.

Notísia Relevante : Sosiedade sivíl diálogu ho Governu kona-bá konseitu prevensaun COVID-19

Diretór Ezekutivu FONGTIL, Daniel Santos do Carmo, esklarese katak  FONGTIL hala’o diálogu ne’e ho nia objetivu atu konsentra hanoin no opiniaun sira kona-bá solusaun sira ne’ebé di’ak ba problema infraestrutura báziku sira ne’ebé kauza hosi inundasaun ho mós buka solusaun ba impaktu hosi pandemia COVID-19.

“Objetivu prinsipál hosi diálogu ne’e, kona-bá impaktu hosi COVID-19 ba inundasaun infraestrutura báziku, hanesan saneamentu, bee-moos, eletrisidade no estrada rurál tanba ida ne’e liga ba povu-nia moris. Governu agora iha prosesu preparasaun Orsamentu Jerál Estadu ba 2022 tanba ne’e mak FONGTIL inisia diálogu ida ne’e atu komunika ho Governu nia intensaun oinsá atu investe maka’as iha setór produtiva, infraestrutura báziku sira ne’e bele kontribui ba atinje estratéjia dezenvolvimentu nasionál,” Daniel dos Santos Carmo haktuir iha salaun Comição Nacional de Eleições (CNE), Caicoli, Dili.

Liuhosi diálogu ne’e bolu Governu liuhosi Empreza estatál rua hanesan BTL,EP ho EDTL,EP  atu rona sira-nia planeamentu ne’ebé adekuadu hodi antesipa oinsá labele mosu inundasaun, ka mosu inundasaun oinsá sira iha kapasidade prevensaun atu bele hasees, salva infraestrutura sira ne’ebé sei konstrui mai tan.

“Tuir ita-nia sientista katak iha Timor laran tomak kada tinan iha poténsia boot sei hamosu inundasaun, tanba ne’e liuhosi diálogu ida ne’e oinsá influénsia desizaun Governu liuliu Ministériu Obras Públiku atu investe maka’as, iha setór eletrisidade, bee-moos, saneamentu no estrada rurál,” Daniel dos Santos  Carmo hateten.

Nia afirma, situasaun kona-ba bee-moos durante ne’e komunidade maioria seidauk bele asesu di’ak infraestrutura báziku liuliu bee-moos tanba investimentu ba bee-moos kada tinan seidauk atinje 5%.

Iha fatin hanesan, Vise Prezidente Ezekutivu Komisaun BTL,EP, Gustavo da Cruz hateten, diálogu ne’ebé sosiedade sivíl halo, konvida BTL impotente tebes tanba sira bele fahe informasaun servisu BTL nian ba sosiedade sivíl oinsá intervensaun hosi BTL ba iha kalamidade ne’ebé akontese iha loron 04 abríl liubá.

“Ami hato’o intervensaun no planu saida mak ami halo hosi prevene ba inundasaun iha kapitál Dili, tanba ne’e inundasaun ne’ebé foin lalais akontese ne’e felizmente BTL konsege rekoopera hotu ona problema bee-moos nian tanba ami utiliza kuaze fulan ida rekupera no sistema bee-moos iha kapitál Dili, agora la’o normál,” nia hateten.

Nia afirma, hosi rekupera sistema bee-moos iha Dili laran ne’e falta de’it mak sistema bomba iha Becora ne’ebé ekipa BTL hala’o hela servisu.

“Espera semana oin, bele finaliza hodi distribui fali bee-moos ba rezervatóriu iha Fatuahi, nune’e komunidade iha área Camea bele asesu bee-normál,” nia tenik.

Komunidade iha Dili ne’ebé daudaun asesu ba bee-moos ne’e hamutuk 17.000 konsumidór, maibé ida ne’ebé ba selu bee-moos 30% de’it.

Nia hatutan, momentu akontese inundasaun iha kapitál Dili, BTL hamutuk ho parseiru sira instala kedas tanke bee-moos mobile hamutuk 100 ba kada bairru-sira iha Dili laran enxe atu komunidade konsumu, maibé semana rua kotuk, sistema bee-moos di’ak hotu no komunidade bele asesu normál.

Supervizór ba Planu Sistema Dezeñu Peskiza Verifikasaun Inspesaun Tékniku EDTL,EP, José Fernandes, hateten EDTL nia prezensa iha diálogu ne’e atu ko’alia kona-bá eletrisidade nian durante iha situasaun COVID-19 no inundasaun, tanba ne’e parte EDTL ko’alia kona-bá sustentabilidade hosi produsaun to’o atendimentu konsumidora.

“Agora ita ko’alia kona-ba sustentabilidade ne’e nia fatór importante liu mak produsaun mina, no ninia produsaun ne’ebé mak agora daudaun EDTL iha ne’e ami informa katak ita-nia kustu produsaun aas, maibé ita-nia reseita ita kobre agora daudaun ne’e ki’ik liu, entaun ida ne’e afeta ba sustentabilidade,” José Fernandes hateten.

Kona-ba gastu eletrisidade no resita kada tinan, José Fernandes tenik, kada tinan ba gastu hamutuk millaun $100 no reseita ba finál 2021 nian iha millaun $35.000 de’it. Tanba mós konsumidór sira ne’ebé seidauk iha kontadór iha territóriu Timor-laran tomak ne’e hamutuk 70.000 liu.

“Ba sira ne’ebé seidauk iha kontadór ne’e EDTL planu atu ba monta iha tinan ne’e tanba hosi konsellu administrasaun ami-nia Prezidente informa ona katak sei hola kontadór,” nia hateten.

Jornalista : Arminda Fonseca

Editór       :  Francisco Simões

HAKEREK NO HATÁN

Please enter your comment!
Please enter your name here