Rede Sosiedade Sivíl ho Governu hala’o diálogu ho Governu kona-bá konseitu no pratika prevensaun COVID-19, sesta (04/06). Imajen Tatoli /Francisco Sony

DILI, 04 juñu 2021 (TATOLI)-Rede sosiedade sivíl ne’ebé organiza hosi Forum Organizasaun Naun Governamentál Timor-Leste (FONGTIL), sesta ne’e,  iha salaun Comição Nacional de Eleições (CNE), Caicoli, Dili, halo diálogu ho Governu hodi partilla opiniaun ba malu kona-bá konseitu no pratika prevensaun surtu COVID-19  no hasa’e tasa partisipasaun komunidade iha vasina AstraZeneca.

Notísia Relevante : COVID-19: pozitivu 112, rekoperadu 134 no ativu 2.580

Diretór Ezekutivu FONGTIL, Daniel do Carmo Santos, hateten objetivu sosiedade sivíl halo diálogu ho Governu ne’e atu konsentra opiniaun sira hodi hadi’a problema sosiál, liuliu kona-ba saúde liga ho COVID-19.

FONGTIL haree katak maioria komunidade seidauk intende didi’ak kona-bá prevensaun COVID-19 no vasina AstraZeneca, nune’e hosi diálogu ne’e bele tau opiniaun hamutuk hodi hasa’e tasa partisipasaun komunidade nian iha prevensaun COVID-19 no vasina AstraZeneca nian.

“Ita-nia Primeiru-Ministru (PM) hateten katak to’o dezembru 2021, populasaun simu vasina AstraZeneca tenke to’o 80%, maibé ita haree katak, PM nia mehi ne’e di’ak, maibé dala-ruma mehi sira-ne’e la atinje tanba kapasidade Ministériu Saúde no relevante nian internu atu mobiliza sensibiliza ita-nia populasaun atu partisipa iha vasina ne’e sei menus,” Daniel do Carmo Santos, hateten ba jornalista- sira.

Liuhosi diálogu ne’e bolu Governu no Organizasaun Mundiál  Saúde  (OMS) ho  sosiedade sivíl sira seluk ne’ebé servisu iha setór saúde atu kontribui opiniaun, no tau ideia hamutuk ajuda monitoriza, oinsá ba oin Primeiru-Ministru ninia mehi hakarak to’o dezembru populasaun 80% tenke simu ona vasina.

FONGTIL propoin ba Ministériu Saúde (MS) mak komunidade atu prevene-aan hosi COVID-19 no simu vasina maka MS tenke fó edukasaun no sensibilizasaun ba komunidade kona-bá importánsia hodi vasina no vasina nia risku sira.

FONGTIL hato’o ba MS kona-bá vasina AstraZeneca ba populasaun labele simu vasina jerál de’it, maibé halo grupu, katak iha vasina masál iha suku-sira Timor laran tomak no seluk mak populasaun ne’ebé atu simu iha sentru saúde ne’e sira ne’ebé bainhira iha moras komplikadu ruma.

Nia hatutan, komunidade atu partisipa hotu vasina ne’e MS labele mesak halo sosializasaun informasaun COVID-19 no vasina nian, maibé presiza servisu hamutuk ho ministériu relevante sira seluk hotu ezemplu hanesan, Ministériu Asuntu Parlamentár Komunikasaun Sosiál, (MAPCOMS-sigla portugés) tanba MAPCOMS ninia funsaun ne’e sensibiliza fó informasaun ba povu, oinsá mak ema bele hetan informasaun kona-ba importánsia hosi vasina.

Iha fatin hanesan, Ministra Saúde, Odete Maria Freitas Belo, konsidera diálogu ho sosiedade sivíl  importante tebes tanba bele fahe informasaun ba malu no  rona mós saida mak sosiedade sivíl hakarak.

“Importante mak rona, entaun prontu rona idea sira hotu, tau hamutuk no ami bele fahe saida mak ami hatene, entaun kona-ba vasina nian ne’ebé daudaun ne’e ema barak ta’uk vasina, tanba dehan, hanesan de’it simu vasina mós pozitivu fila-fali. Ha’u hateten katak vasina ne’e la’ós atu kura COVID-19 maibé nia ajuda haforsa imunidade tanba to’o agora COVID-19 nia ai-moruk seidauk iha,” Odete Belo afirma tan.

Nia esplika, bainhira ema ne’ebé simu ona vasina AstraZeneca maske nia pozitivu fali COVID-19 maibé ninia risku atu transmite virus ne’e ba ema seluk ki’ik loos ona tanba vasina ne’ebé iha isin kontra virus refere tanba imunidade ne’e forsa.

“Ita-nia obrigasaun atu fahe informasaun sira ba komunidade atu komunidade hatene informasaun loloos hosi vasina  ne’e,” Ministra Odete tenik.

Kona-ba prevensaun COVID-19, nia esklarese, dalan di’ak mak hotu-hotu tenke kumpre regra OMS nian, fase liman beibeik, uza máskara no  distansiamentu.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here