Membru PNTL hosi Diresaun Nasionál Tránzitu no Seguransa Rodoviária (DNTSR), hala’o pasa revista no halo apreensaun ba motór ne’ebé laiha dokumentu, iha Palásiu Governu oin, kuarta (26/05/21). Imajen Tatoli/António Gonçalves.

DILI, 16 juñu 2021 (TATOLI)—Polisia Nasionál Timor Leste (PNTL), munisípiu Dili halo apreensaun ba motorizada Timoroan na’in 47 nu’udár adeptu ne’ebé lori bandeira nasaun Portugál halo konvoi iha sidade Dili, durante jogu kontra nasaun Hongaria iha Taxa EURO 2021, tersa (15/06) kalan.

Portatavóz Komandu Jerál PNTL, Superintendente Xefe, Arnaldo de Araújo konsidera adeptu Timoroan sira-ne’e kontra regra Estadu Emerjénsia, Serka Sanitária no Konfinamentu Domisiliáriu jerál, ne’ebé implementa iha kapitál Dili.

Notísia relevante:PNTL halo apreensaun ba motór 60 no karreta haat

Durante halo apreensaun, PNTL indentifika adeptu hirak-ne’e balun la uza kapasete, motór uza kanu barrullu, la iha xapa matrikula, dokumentu inválidu no laiha karta kondisaun, ne’ebé konsidera viola kódigu estrada.

“Ita-nia polísia halo pasa revista hodi preende motorizada 47, tanba adeptu Timoroan sira-ne’e halo kovoi hala’e sidade Dili no kontra kódigu estrada,” Portavós PNTL, hateten ba jornalista-sira iha Komandu Jerál PNTL, Caicoli, kuarta ne’e.

Durante halo apreensaun, polísia sosializa mós regra Estadu Emerjénsia ba adeptu hirak-ne’e atu kumpre no labele halo konvoi hodi evita asidente tráfegu.

Hafoin halo apreensaun, PNTL pasa kedan tikete infrasaun atu selu multa iha banku no motorizada kontinua lori ba asegura iha Komandu PNTL munisípiu Dili ho Komandu Jerál PNTL.

Polisia mós alerta nafatin ba abitante-sira katak, durante jogu taxa EURO 2021 hahú, ema hotu-hotu halo viazen ba mai tenki lori dokumentu motór kompletu, labele haluha uza kapasete, labele kondús transporte ho kondisaun lanu hodi evita asidente.

Tuir observasaun Agência Tatoli, hafoin ekipa Portugál manan nasaun Hongaria 3-0 iha taxa EURO 2021, adeptu Timoroan rihun-resin ho transporte hala’o konvoi hale’u kapitál Dili hodi espresa sira-nia kontente.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here