Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, inaugura kuarentena sub-rejiaun Pasabe. Imajen Tatoli/Abilio Elo Nini.

OÉ-CUSSE, 18 JUÑU 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sesta ne’e ofisiálmente inaugura kuarentena iha aldeia Pasabe, suku Abani, sub-rejiaun Pasabe.

Notísia Relevante: Autoridade RAEOA prepara kuarentena ba Atoni-oan hosi Dili

“Kuarentena ne’e la’ós de’it fatin atu akomoda ba pasiente COVID-19 sira, maibé ita tenke prepara kondisaun ba loron aban nian bele nakfilak sai sai mini ospitál referál iha sub-rejiaun Pasabe ne’e. Ita tenke hanoin dook ba loron aban nian,” Arsénio Bano hateten.

Imajen Tatoli/Abilio Elo Nini.

Autoridade RAEOA deside harii kuarentena ho intensaun atu integra servisu COVID-19 nian ba sistema saúde públiku. Tanba ne’e, autoridade iha planu oioin atu fasilidade saúde tenke aumenta, la’ós de’it harii kuarentena iha Kitahara Mahata, Oesilo, Sakato, Kiu-Maonteko no Citrana, maibé Pasabe mós importante.

Iha fatin hanesan, Sekretáriu Rejionál Saúde Manuel da Costa hateten, kuarentena ne’e estabelese ho fundu COVID-19 ho objetivu atu bele akomoda pasajeiru sira-ne’ebé tama ilegál iha sub-rejiaun Pasabe. Pasajeiru sira-ne’e la persiza transporta ba to’o Oé-Cusse Vila maibé bainhira deteta balun positivu COVID-19 mak bele transporta ba izolamentu Pante Makasar.

“Ami hanesan parte saúde sente previleiju boot tanba bele hetan ona infraestrutura ne’ebé kualidade di’ak, liu-liu apoiu tan servisu pesoál saúde sira ne’ebé futuru bele utiliza. Karik, ita ultrapasa pandemia COVID-19, ami bele utiliza ba fatin ba internamentu,” Manuel da Costa hateten.

Iha biban hanesan, Jestór Sub-Rejiaun Pasabe, Anton Ulan, hato’o agradesimentu ba autoridade RAEOA tanba bele estabelese fasilidade saúde iha sub-rejiaun ida-ne’e iha situasaun emerjénsia no pandemia COVID-19 ne’e.

Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, inaugura kuarentena sub-rejiaun Pasabe. Imajen Tatoli/Abilio Elo Nini.

“Uluk nanain, lori ha’u-nia povo sub-rejiaun Pasabe nia naran hakarak hato’o agradesimentu tanba prezidente autoeridade iha planu di’ak hodi estabelese fasilidade saúde iha fatin ne’e. Ida-ne’e sei fasilita no fó atendimentu ba povu rihun sia (9) iha ha’u nia sub-rejiaun,” Anton Ulan hateten.

Kuarentena ne’e konstrui hosi empreza Neon-Mantaen Unipesoal ho totál orsamentu $114, 432.04 ho medida 26×10, durasaun kontratu fulan neen (6), kuartu 12, salaun enkontru ida (1) no haris-fatin hamutuk 13.

Sub-Rejiaun Pasabe komopstu hosi suku rua (2) mak suku Malelat iha aldeia ida mak aldeia Malelat no suku Abani iha aldeia tolu (3) mak aldeia Pasabe, Haemnanu no aldeia Naetuna.

Jornalista: Abilio Elo Nini

 

Editór: Cancio Ximenes

HAKEREK NO HATÁN

Please enter your comment!
Please enter your name here