Estrada ligasaun postu administrativu Maliana ba Bobonaro to’o suku Kota-boot. Imagen Tatoli/Sérgio da Cruz.

BOBONARO, 18 juñu 2021 (TATOLI)—Xefe Suku kota-boot, Miguel Gonçalves, informa komunidade iha suku ne’e labele lori produtu lokál atu faan ba merkadu iha Bobonaro vila no mós Maliana tanba kondisaun aat totál.

“Ami-nia estrada mak la di’ak. Hosi kedan suku ba Bobonaro vila no ba Maliana atu faan produtu lokál labele. Pior liu mak iha tempu udan, ne’e movimentu para totál,” Miguel Gonçalves hateten ba jornalista Agência Tatoli via telefónika, kinta ne’e.

Notísia relevante:PNDS sosializa programa RKRE ba suku 32 iha Bobonaro

Situasaun ne’e halo autoridade lokál preokupa tinan barak ona tanba populasaun maioria moris hanesan agrikultór, no presija tebes lori sira-nia produtu ba merkadu atu bele hatutan moris.

“Iha tempu udan, labele ba faan produtu iha merkadu tanba estrada aat hotu, ha’u-nia povu maioria hetan osan hosi faan produtu lokál, maibé estrada mak sai barreira boot,” nia subliña.

Entretantu, produtu lokál ne’ebe suku ne’e iha mak hanesan, fehuk-roupa, talas, liis-mean, liis-mutin, koto no produtu sira seluk tán.

Populasaun iha suku Kota-boot, postu administrativu Bobonaro, munisípiu Bobonaro hamutuk 1.057 kompostu hosi aldeia rua mak hanesan Ou-bue no Ai-meta.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here