Reitór UNPAZ, Adolmando Soares Amaral. Imajen Tatoli/Eugénio Pereira

DILI, 18 juñu 2021 (TATOLI) –Magnífiku Reitór Universidade da Paz (UNPAZ), Adolmando Amaral, informa iha loron 27 juñu ne’e, UNPAZ reativa atividade letiva ensinu aprendizajen aula prejensiál.

Notísia Relevante : Funsionáriu ho estudante UNPAZ na’in-600 simu ona vasina

Molok reativa aula prejensiál ne’e,  Magnífiku Reitór Adolmando Amaral ho ekipa reitoria, prepara uluk kondisaun ba estudante, funsionáriu no dosente UNPAZ nian, atu simu vasina doze daruak iha loron 23 juñu ne’e.

“Ami hahú ona ho vasina AstraZeneca doze dahuluk no sei kontinua tan doze  daruak iha loron 23 juñu. Hakarak ka lakohi, ami lahein tan ona orientasaun Governu nian, hahú 27 juñu, ami reativa ona atividade letiva ensinu aula prejensiál iha UNPAZ,” Adolmando Amaral, haktuir  ba Agência Tatoli iha kampus UNPAZ, Dili, sesta ne’e.

Nia esplika UNPAZ nu’udar instituisaun ensinu superiór privadu bainhira iha atividade letiva mak foin hetan reseita, bainhira atu reativa atividade aula prejensiál kondisaun ne’ebé sira prepara maka husu ba dosente no funsionáriu inklui estudante-sira tenke simu hotu vasina.

Adolmando esklarese katak desizaun Konsellu Ministru hodi reativa atividade ekonomia, atividade transporte públiku no atividade relijiozu, maibé kontinua pendenti atividade eskola hahú hosi ensinu báziku to’o ensinu superiór, ne’e ho intensaun atu estraga edukasaun jerál iha Timor-Leste.

Tuir nia, loloos VIII Governu Konstitusionál tau liu prioridade ba edukasaun, la’ós ba buat sira seluk. Tanba edukasaun mak fatór importante ida atu fó ezisténsia futuru nasaun ne’e nian.

“Ha’u haree desizaun governu nian laiha liu lójika. Razaun ta’uk reativa eskola ne’e tanba estudante-sira bele lori fali moras ba eskola. Se hanesan ne’e, oinsá ho atividade ekonomia, atividade relijiozu, atividade transporte públiku bele lori moras ba sosiedade ka lae,” Adolmando tenik.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here