Konstrusaun no perfurasaun sistema bee-mos iha bairru Noa-Ana, aldeia Mahata, suku Lela-Ufe, sub-rejiaun Nitibe. Imajen/Mídia RAEOA-ZEESM.

OÉ-CUSSE, 17 JUÑU 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), kuarta (16/06) horisehik halo fiskalizasaun ba konstrusaun no perfurasaun sistema bee-moos iha bairru Noa-Ana, aldeia Mahata, suku Lela-Ufe, sub-rejiaun Nitibe ne’ebé konstrui hosi empreza Am-Lhichoe Unipesoal ne’e atinje ona 21%.

Notísia Relevante: PA RAEOA lansa primeira pedra ba perfurasaun bee-moos iha Nitibe

“Horisehik, ha’u ho tékniku sira halo ona fiskalizasaun ba servisu perfurasaun bee-moos iha Noa-Ana, no projetu ne’e sei fó benefísiu ba suku Lela-Ufe. Ba oin ne’e, RAEOA fó prioridade liu ba bee-moos. Entaun, horisehik, ami ba para asiste empreza ne’ebé mak manan tender iha ne’ebá, nia hahú dadauk prosesu konstrusaun perfurasaun bee-moos ne’ebé atinje ona 21%,” Arsénio Paixão Bano informa ba Agência TATOLI, iha nia residensia Oé-Bau, kinta ne’e.

Konstrusaun no perfurasaun sistema bee-mos iha bairru Noa-Ana, aldeia Mahata, suku Lela-Ufe, sub-rejiaun Nitibe. Imajen/Mídia RAEOA-ZEESM.

Aleinde ne’e, Prezidente RAEOA ne’e hala’o mós fiskalizasaun ba projetu konstrusaun perfurasaun sistema bee-moos iha bairru Numbei, suku Costa, ne’ebé konstrui hosi empreza Colo Unipesoal ne’ebé konstrusaun fízika atinji ona 59%, ho totál volume bee-moos lima (5) mil litru (ekivalensia 5000 mil litru) no projetu ne’e sei finaliza iha tempu badak.

Projetu ne’e sei fasilita bee-moos ba komunidade sira inklui ba komersiante sira-ne’ebé hala’o atividade negósiu merkadu Numbei, atu nune’e sira bele asesu ba bee-moos loro-loron.

Entertantu, Diretór Empreza Am-Lhichoe, Eurico da Rosa hateten projetu konstrusaun no perfurasaun sistema bee-moos ne’e atu fasilita bee-moos ba komunidade iha aldeia tolu (3) mak aldeia Mahata, Kuat-Enas no aldeia Nefo-Lete ho totál uma kain 176 ho abitante hamutuk 1250, ho nia volume bee-moos 100 mil ho ekivalensia 1000 mil litru ne’ebé fahe ba Tanke tolu (3).

“Tanke tolu ne’e, ida iha bairru Oél-Taupi, bairru Oélila no bairru Basfain ho konstrusaun fízika atinje ona 21%,” nia dehan.

Projetu konstrusaun ne’e konstrui iha suku Lela-Ufe, sub-rejiaun Nitibe, bairru Noa-Ana, aldeia Mahata ho kustu valór $494,727.59. Projeitu konstrusaun perfurasaun sistema bee-mos iha bairu Numbei, suku Costa, sub-rejiaun Pante Makasar ne’ebé konstrui hosi Empreza Colo Unipesoal ho kustu valór $63,072.30.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here