Lansamentu primeira pedra ba perfurasaun bee-moos iha Nitibe. Imajen/Mídia RAEOA ZEESM-TL.

DILI, 23 Janeiru 2021 (TATOLI)—Prezidente Autoridade (PA) Rejiaun Administrativu Espesiál Oé-Cusse Ambeno (RAEOA) no Zona Espesiál Sosiál Ekonomia Merkadu-Timor-Leste (ZEESM-TL), Arsénio Bano, halo lansamentu ba primeira pedra ba projetu konstrusaun no perfurasaun sistema bee-moos iha Bairru Noa-Ana, Aldeia Mahata, Suku Lela-Ufe, Sub-Rejiaun Nitibe.

Arsénio Bano hateten, iha 2020-2021 Autoridade RAEOA sei halo projetu konstrusaun no perfurasaun sistema bee-moos hamutuk hitu (7) no tuir planu iha 2021 ne’e Bee-Moos sai hanesan prioridade atu nune’’e komunidade sira labele halerik ba Bee-Moos.

“Tinan ida-ne’e, bee-moos sai prioridade ba polítika RAEOA nian, atu nune’e komunidade sira labele halerik tan ba bee-moos. Ha’u husu ba komunidade sira hela iha ne’ebá atu servisu hamutuk ho Servisu Água no Saneamentu (SAS) no haree didi’ak konstrusaun ida-ne’e, atu bele uza to’o tempu naruk,” Arsenio Bano hateten ba Agência TATOLI liuhosi telefónika, sábadu ne’e.

Lansamentu primeira pedra ba perfurasaun bee-moos iha Nitibe. Imajen/Mídia RAEOA ZEESM-TL.

Nia hatutan, objetivu hosi projetu konstrusaun no perfurasaun sistema bee-moos ida-ne’e atu fasilita bee-moos ba komunidade sira ne’ebé hela iha Aldeia tolu (3) mak hanesan Aldeia Mahata, Kuat-Enas no Aldeia Nefo-Lete, iha Suku Lela-Ufe ho uma-kain hamutuk 176 ho totál abitante hamutuk 1.250.

Iha fatin hanesan, Xefe Suku Lela-Ufe, José Neno Sila, lori komunidade nia naran hato’o obrigadu ba Autoridade RAEOA ne’ebé fó atensaun ba problema bee-moos iha sira-nia suku ne’ebé kle’ur tebes sira hasoru.

“Ohin, ami hotu-hotu kontente tebes tanba ami haree ba konstrusaun no perfurasaun sistema bee-moos ne’ebé fó benefisiu ba ami-nia vida loro-loron. Ha’u lori komunidade nia naran hato’o obrigadu barak ba Autoridade RAEOA,” nia hateten.

Aleinde ida-ne’e, xefe suku ne’e husu ba Autoridade RAEOA atu tau matan mós ba kondisaun estrada ne’ebé liga ba Aldeia Lela-Ufe ba kapitál.

Komunidade Bairru Noa-Ana, Aldeia Mahata, Suku Lela-Ufe, Sub-Rejiaun Nitibe, partisipa iha serimónia lansamentu primeira pedra ba perfurasaun bee-moos. Imajen/Mídia RAEOA ZEESM-TL.

Entretantu, Diretór Kompañia Am-Li Choe Unipessoal, Eric Lisu, hateten importansia obra ne’e ba komunidade ne’ebé hela iha ne’ebá no prontu atu halo obra ida-ne’e ho kualidade no termina ho di’ak tuir data ida ne’ebé previstu iha kontratu.

Iha biban hanesan, Diretór Rejionál Infraestrutura, Candido Amaral, husu ba kompañia manan-na’in ba tender ida-ne’e atu halo obra perfurasaun bee-moos ho di’ak no ho kualidade, atu nune”e bele fó benefisíu ba komunidade sira-ne’ebé hela iha suku refere.

Lansamentu primeira pedra ne’e hala’o hosi Prezidente Autoridade RAEOA hamutuk Sekretáriu Rejionál, Diretór Rejionál, Xefe Suku, Xefe aldeia no Lia-na’in sira.

Iha lansamentu ne’e akompaña hosi Sekretáriu Rejionál Adjuntu Prezidente Autoridade ba Asuntus Sociais Maximiano Neno, Sekretário Rejionál  Agrikultura José Eta, Sekretáriu Rejionál  Komérsiu no Indústria Pedro da Cunha B da Silva, Sekretáriu Rejionál  Saúde Manuel da Costa, Diretór Rejionál Infraestrutura Candido dos Reis Amaral, Xefe Departamentu SAS Gil de Sousa ho nia ekipa no partisipa hosi Jestor Nitibe, Xefe Suku Lela-Ufe no komunidade sira.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here