Atividade labarik sira iha Merkadu Taibesi, Labarik sira ne'e lori bote lao tama sai Merkadu Taibesi hodi buka lata mamuk hodi hili. Imajen Tatoli/Antonio Goncalves.

DILI, 17 juñu 2021 (TATOLI)—Deputadu sira iha Parlamentu Nasionál (PN) inísia ona projetu-lei ida hodi fó protesaun ba labarik sira iha Timor-Leste, nune’e inan-aman sira tenke respeita labarik sira-nia direitu.

Parlamentu Nasionál liuhosi Komisaun F ne’ebé trata asuntu Saúde, Seguransa Sosiál no Igualdade Jéneru, kinta ne’e halo ona deliberasaun data lokál no audiénsia públika ba projetu-lei protesaun labarik no joven perigu.

Notísia Relevante: Parlamentu Nasionál sei inísia projetu-lei protesaun ba labarik sira

Prezidente Komisaun F, Deputadu Noé da Silva Ximenes “Buka-Tuir” esplika, iha tempu tuir mai sei halo audiénsia públika ho entidade relevante sira-ne’ebé relevante ho situasaun labarik sira iha Timor-Leste.

“Inisiativa ne’e tuir lei hateten, inisiativa ne’e bele mai hosi kada deputadu sira hosi bankada parlamentár ne’ebé mak iha asentu parlamentár, bele mós mai hosi deputadu individuál sira. Purtantu, ne’e tenke másimu deputadu na’in-10 bele aprezenta ona inisiativa, entaun ami prenxe ona rekizitu ida-ne’e hodi aprezenta esbosu-lei ne’e ba plenária,” Prezidente Komisaun F ko’alia iha uma fukun.

Nia fundamenta, razaun espesífika ba inisiativa ne’e tanba haree ba kondisaun labarik sira oras ne’e barak mak buka moris iha estrada (luron) ninin.

Depuatdo PLP, Noe da Silva Ximenes. Imajen Tatoli/Egas Cristovão

“Entaun, ita tenke halo lei ida atubele proteje labarik sira-ne’ebé halo serbisu tanba agora daudaun ne’e ita-nia inan-aman sira husik de’it ita-nia oan sira atu halo sebisu ne’ebé seidauk merese ba labarik sira. Lei ida-ne’e atubele garante ita-nia sidadaun sira-nia direitu, liu-liu oan sira-nia direitu ba asesu edukasaun no asesu ba situasaun moris nian iha tempu ida agora ne’e,” nia dehan.

Prezidente Komisaun F fó-sai katak, iha deliberasaun ba projetu-lei ne’e deputadu hotu-hotu fó sira-nia apresiasaun ba lei refere. Deputadu Sira hosi Komisaun F ne’e hotu-hotu fó sira-nia kontribuisaun ba ezbosu-lei ne’e hodi kontribui ideia ba esbosu-lei ne’e.

“Ita-nia esperansa mak oinsá mak fó garantia moris ba ita-nia oan sira no fó mós edukasaun sívika ba sidadaun sira, liuliu inan-aman sira labele husik ita-nia oan sira iha estrada ninin. Tanba, labarik sira-nia direitu ne’e atu hetan edukasaun, la’ós buka-moris iha estrada ninin. Ida-ne’e mak ita-nia esperansa atu hetan iha futuru,” nia akresenta.

Tuir planu Komisaun F sei bolu uluk Ministériu Solidariedade Sosiál no Inkluzaun (MSSI), sei bolu mós konfisaun relijioza tantu Katólika, Musulmanu no sira seluk tan.

Deputadu sira hola insiativa ida-ne’e hodi komprimenta artigu 18 (Protesaun ba labarik-oan sira) hosi Konstituisaun RDTL, númeru 1 mensiona labarik sira iha direitu ba protesaun espesiál hosi família, komunidade, no mós Estadu, liu-liu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.

Númeru 2 hosi artigu ne’e hateten, labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé Estadu aprova no simu ona ka ratifika fila-fila.

Númeru 3 hosi artigu 18 ne’e esplika, labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Entretantu Deputadu sira hosi Komisaun F hola inisiativa ne’e mós bazea ba Rejimentu Parlamentu Nasionál artigo 96 (Ezerse inisiativa lejizlativa), númeru 1 dehan, laiha projetu-lei ida mak bele subskritu hosi deputado liu na’in-10.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here