Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves

DILI, 26 maiu 2021 (TATOLI)—Sekretária Estadu Protesaun Sivíl (SEPS), kontinua halo verifikasaun dadus ba família afetadu dezastre naturál ne’ebé akontese iha 04 abríl, hodi bele fó apoiu materiál konstrusaun.

“Ekipa konjunta liña ministériu no parseiru halo ona verifikasaun ba uma ne’ebé estragu, agora iha prosesu aprovasaun atu ita bele kontinua apoia materiál konstrusaun,’’ Diretór Nasionál Jestaun Risku Dezastre Naturál, SEPS, Agostinho Cosme Belo, hateten ba jornalista-sira iha eskola 4 setembru Balide, kuarta ne’e.

Notísia relevante:SEPS distribui apoiu umanitáriu ba família 401 iha Mascarenhas-Camea

Agostinho Cosme Belo dehan, iha família rihun tolu-resin mak oras-ne’e SEPS halo hela analiza, nune’e bainhira aprova ona sei distribui materiál konstrusaun.

Nia garante katak, família hotu ne’ebé uma hetan estragu sei hetan apoiu materiál konstrusaun, hodi bele rekonstrui fila-fali.

Tuir dadus hosi Ministériu Administrasaun Estatál (MAE), rejista família afetadu dezastre naturál iha territóriu nasionál hamutuk 33.280, númeru ne’e 27.622 hosi Dili.

Tuir rezultadu verifikasaun iha Dili, uma afetadu iha 25.928 kompostu hosi aat kamán 24.820, aat natón 553 no aat totál 554.

Iha 14 maiu 2021, SEPS halo lansamentu apoiu materiál konstrusaun ba família 21 iha suku Bemori, postu administrativu Na’in-Feto, munisípiu Dili.

Iha 24 maiu 2021, SEPS kontinua fó apoiu materiál konstrusaun ba família 37 iha suku Balibar, postu administrativu Cristo Rei, munisípiu Dili.

Pakote materiál konstrusaun ba kada vítima ne’ebé uma hetan estragu totál simu kalen 0.30m tahan 50, pregu kalén 2kg, pregu 12cm 2kg, pregu 10cm 2kg, pregu 7cm 4kg, besi betón 10mm 12 barra, besi betón 8mm  10 barra, arme finu rolu 2 ho semente tonasa 40kg saka 25 no osan mão de obra ho ai-kuadradu $356 hodi bele selu badaen.

Uma ne’ebe aat natón simu kalén ho pregu ho osan $356, no aat kamán sei simu kalén no pregu kalén ho osan $150.

Iha prosesu distribuisaun ne’e, família-sira simu uluk maka materiál konstrusaun, maibé kona-bá osan hanesan mão de obra ho ai-kuadradu  sei simu iha faze tuir-mai tanba sei hein bainhira osan hetan aprovasaun.

SEPS halo estimasaun hodi hato’o ona pedidu ba Ministériu Finansa (MF), husu orsamentu hamutuk millaun $42, liu hosi fundu kontijénsia atu bele fó apoiu ba rekoperasaunuma ne’ebé hetan estragu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here