Komandante Polísia Munisípiu Dili, Superintendente Xefe Hendrique da Costa. Imajen Tatoli/Dok.

DILI, 16 juñu 2021 (TATOLI)—Polísia Nasionál Timor Leste (PNTL) munisípiu Dili, koopera ho Polísia Nasionál Serbisu Investigasaun Kriminál (PNSIK) no Serbisu Informasaun Polísia (SIP), kontinua halo identifikasaun ba rede grupu na’ok-teen rona-malu ‘nakroma’ ne’ebé durante ne’e movimentu makaas hodi na’ok motór iha munisípiu haat.

Komandante PNTL munisípiu Dili, Superintendente Xefe, Henrique da Costa, fó-sai dadus ne’ebé ekipa investigasaun rekolla, paradeiru no movimentasaun grupu ne’e hodi na’ok motór makaas liu iha munisípiu Dili, Ermera, Baucau no Ainaro.

Notísia relevante:Polísia rekolla ona motór 24 hosi “NAKROMA”

Iha identifikasaun deskobre katak, rede ne’e boot no hala’o atividade hodi foti-na’ok ema-nia motór iha tempu kalan iha Dili no lori ba fa’an iha munisipiu tolu no hosi munisípiu tolu lori fali mai faan iha Dili.

“Ita identifika grupu nakroma ho movimentu makaas liu iha munisípiu ne’ebé temi ona,” Superintendente Xefe, Henrique da Costa hateten ba jornalista-sira iha Komandu PNTL, kuarta ne’e.

PNTL mós konsege kaptura suspeitu nakroma hamutuk na’in 13 ne’ebé indentifikadu foti subar motór komunidade hamutuk  42 no suspeitu hirak-ne’e balun kazu prosesa iha tinan 2020 no balun iha 2021.

Kona-bá motorizada hirak ne’ebé PNTL rekolla, balun sei asegura hela iha Komandu PNTL munisípiu Dili, hodi hein vítima-sira ne’ebé sente motór lakon, bele halo keixa no lori dokumentu kompletu ba PNTL hodi halo indentifikasaun.

Henrique da Costa apela ba abitante-sira atu kuidadu bainhira para motór iha fatin públiku ka uma laran, tenki xave metin volante motór, tanba grupu ne’e uza maneira no tékniku oin-oin atu bele foti na’ok motór.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here