Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 27 janeiru 2021 (TATOLI)–Ekipa konjunta Servisu Informasaun Polísia (SIP) no Komandu Polísia Munisípiu Dili konsege rekolla motór hamutuk 24 ne’ebé grupu NAKROMA no indivíduu “lori subar”.

“Númeru evidénsia motór ne’ebé ita apreende hamutuk 22, no horisehik lokraik, tersa (26/01), ita hetan tan motór rua. Ida-ne’e sei inklui ka envolve hela iha grupu ida ho naran “NAKROMA”, ne’ebé ita rekolla motór hamutuk 24,” Komandante Polísia Munisípiu Dili, Superintendente Xefe, Henrique da Costa ba jornalista iha Kuartél Jerál PNTL, Caicoli, Dili, kuarta ne’e.

Henrique dehan sira sei kontinua halo operasaun ba motór balun ne’ebé lakon.

Antes ne’e, PNTL rekolla uluk motór hamutuk 19 hodi aprezenta ona ba Ministériu Públiku no balun sei para hela iha areadór Komandu PNTL Munisípiu Dili.

PNTL Dili apela ba sidadaun sira ne’ebé motór lakon bele lori sira-nia dokumentu ba PNTL hodi aprezenta keixa ba Ministériu Públiku para halo justifikasaun.

Komandante Henrique husu ba sidadaun sira bainhira atu sosa motór ruma tenke haree dokumentu no bainhira dokumentu la kompletu di’akliu labele sosa, tanba iha Dili inklui munisípiu sira ema fa’an motór barak lahó dokumentu kompletu, bele deskonfia motór ne’e ilegál hosi Dili mak fa’an ba iha munisípiu, no munisípiu ba fa’an fali iha Dili.

“Ema balun fa’an motór baratu maibé dokumentu laiha. Se hanesan ne’e, husu kontatu kedas mai iha polísia atu ita buka tuir,” nia apela.

Tuir dadus ne’ebé PNTL rekolla, motór balun foti hosi Liquiçá, Baucau, Dili, Manufahi no Viqueque nian.

PNTL sei kaptura suspeitu balun tan inklui halo apreensaun motorizada balun ne’ebé identifikadu ona.

“Bá-oin, motór bele aumenta no suspeitu mós sei asume,” Henrique tenik.

Antes ne’e, iha loron 10 dezembru 2020, PNTL detein uluk suspeitu na’in tolu ho inisiál JDX, JDPC no GDA hodi prosesa ona ba Tribunál Dili no hatún ona desizaun katak suspeitu sira tama prizaun.

Iha 21 janeiru 2021, detein tan suspeitu maun-alin na’in rua ho inisiál TDA no ADC ne’ebé halo korelasaun servisu ho suspeitu na’in tolu hodi “foti-subar” komunidade nia motór.

Suspeitu sira-ne’e PNTL detein no halo apreensaun ba motór Beat Street ida ho xapa matríkula O-2768, Honda Revo rua ho xapa matríkula M-1738 no D-2297. Motór hirak-ne’e aseguradu ona iha Eskuadra PNTL Munisípiu Dili.

Jornalista: Eugénio Pereira

Editór: Xisto Freitas

PUBLISIDADEiklan

HAKEREK NO HATÁN

Please enter your comment!
Please enter your name here