Membru Polísia hosi DNTSR, hala’o pasa revista iha Dili. Imajen/DNTSR.

DILI, 29 abríl 2021 (TATOLI)—Komandu Jerál Polísia Nasionál Timor-Leste (PNTL) liu hosi Departamentu Nasionál Trânzitu no Seguransa Rodoviária (DNTSR) halo apreensaun ba motór 60 no kamioneta haat (4), ne’ebé viola kódigu estrada, iha kuarta 28 abríl lorokraik.

Komandante Polísia DNTSR, João dos Reis Belo hateten, motorizada hirak-ne’e laiha dokumentu no infratór-sira la kumpre regra Serka Sanitária.

Notísia relevante:Polísia tránzitu kontinua kontrola transporte públiku uza máskara

DNTSR rasik simu ona orientasaun hosi Komandu Jerál hodi halo pasa revista ba movimentu transporte ne’ebé utiliza estrada públiku, tenki kumpre regra no kria ambiente kondusaun seguru, efikas no efisiente.

“Ami halo tuir diretiva operasaun ne’ebé komandu fó katak, operasaun ida-ne’e atu eduka sidadaun-sira hodi respeita kódigu estrada no mós iha relasaun ho operasaun ‘Dili hakmatek’, hodi garante katak ema hotu ne’ebé uza estrada públiku tenki kompleta rekézitu hahú kedan hosi karta kondusaun no asesores transporte,” João dos Reis Belo hateten ba jornalista-sira iha Komandu Jerál, Caicoli, kinta ne’e.

Durante halo auto stop, PNTL nota infratór maioria laiha karta kondusaun no laiha asesores hanesan xapa matríkula, lampu no espellu.

“Motorizada no transporte ne’ebé laiha asesores, ezemplu hanesan plat oin kotuk no karta kondusaun la iha. Maibé ba dokumentu ne’ebé inválidu durante periúdu Estadu emerjénsia ita konsidera vale nafatin,” nia subliña.

Ba motorizada-sira ne’ebé halo apreensaun tuir lei, infratór-sira sei lori billete apreensaun ba selu multa iha banku, lori fali resibu hodi ba foti motór atu aproveita trata dokumentu no monta asesor motór nian.

Operasaun auto stop ne’ebé DNTSR halo hodi dezenvolve kampaña ‘Dili hakmatek’ inklui atu eduka sidadaun-sira hodi respeita lei tránzitu no kódigu Estrada.

Polísia Tranzitu sei hala’o pasa revista ba transporte públiku, privadu, Governu ne’ebé halo movimentu iha kapitál Dili, hodi asegura mós regra Serka Sanitária ne’ebé Governu dekreta ona to’o 2 maiu.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here