Pároku, Parókia Santa Cruz Maliana, Padre Valério Gusmão. Imajen Tatoli/Sérgio da Cruz.

BOBONARO, 09 juñu 2021 (TATOLI)—Pároku, Parókia Santa Cruz Maliana, Padre Valério Gusmão, husu ba populasaun iha munisípiu Bobonaro atu labele tauk hodi simu vasina AstraZeneca, tanba ho vasina ne’e bele prevene an hosi virus COVID-19.

Padre Valério Gusmão husu ne’e, tanba tuir nia haree katak, durante ne’e iha ema balun lansa informasaun balun ne’ebé la loos iha média sosiál, hodi hatauk ema atu labele simu vasina ne’e.

Notísia relevante:Bobonaro preparadu simu vasina AstraZeneca doze daruak

“Ha’u husu komunidade labele fiar boatus tanba iha média sosiál ema jeneraliza sasan. Entre ema rihun ida mak simu vasina, maibé ida ka rua mak sente iha reasaun no la’ós ema hotu sente. Tanba ne’e, di’ak liu mak tenke simu,” Pároku ne’e husu, iha Parókia Santa Cruz Maliana, kuarta ne’e.

Bibi-atan ne’e fó sasin katak, nia rasik simu ona vasina doze dahuluk no sente iha vantajen tanba agora han barak kompara ho antes bainhira seidauk simu vasina.

Tanba ne’e, oras-ne’e daudaun Padre ne’e preparadu atu simu tan vasina doze daruak ne’ebé  sei lansa iha fulan ida-ne’e.

Entretantu, pesoál liña frente hamutuk 1.239 iha munisípiu Bobonaro, simu ona vasina AstraZeneca iha faze dahuluk no tuir planu doze daruak sei fó ba ema 5.000 ho ema ne’ebé idade 60 ba leten, inklui sira ne’ebé simu ona doze dahuluk.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here