Prezidente CDTL, Afranio Xavier Amaral, simu vasina AstraZeneca. Imajen/Espesiál

DILI, 16 juñu 2021 (TATOLI) – Prezidente Konfederasaun Desportiva Timor-Leste (CDTL, sigla portugés), Afranio Xavier Amaral, apela ba membru federasaun hotu-hotu atu partisipa ativu iha vasina nasionál hodi hasa’e ida-idak nia imunidade luta kontra pandemia COVID-19.

Notísia Relevante : Federasaun Aikido la obriga atleta tuir vasina

Prezidente CDTL, Afranio Xavier Amaral hamutuk ho atleta balun hosi Federasaun Atletizmu, tersa (15/06), hakat ba ona sentru vasinasaun AstraZeneca iha Sekretaria Estadu Juventude Desportu (SEJD) hodi simu vasina.

“Ita tenke kumpre saida mak Governu fó sai nune’e bele re-ativa fali atividade desportu,”  Afranio Xavier Amaral, informa ba Agência Tatoli iha Jináziu Dili, kuarta ne’e.

“SEJD fó informasaun mai CDTL no ami tatoli hikas kedan ba federasaun hotu tenke partisipa másimu iha vasina ne’e, se federasaun no modalidade sira lakohi vasina pasiénsia labele tama iha pratika desportu so sira ne’ebé vasina mak partisipa iha jogu nasionál no jogu internasionál sira, tanba jogu Sea Games agora prepara hela ita atu partisipa iha novembru no Vietname fó ona ultimatu ba nasaun hotu iha Sudeste Aziátiku katak atleta no ofisiais sira partisipa iha jogu Sea Games tenke vasina, se la vasina mak sei la tama territóriu Vietname,” Afranio hateten.

Nia hatutan, maioria atleta na’in-haat atu ba partisipa iha Olimpics Games vasina hotu ona, maibé foin iha doze dahuluk, nune’e fulan oin  molok arranka ba Tokyo sei simu tan doze daruak hodi kompleta no livremente partisipa iha eventu internasionál ne’e.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here