Idózu no ema ho difisiente forma hodi simu subsídiu iha sukursál BNCTL, iha Dili. Imajen TATOLI/António Gonçalves

DILI, 14 juñu 2021 (TATOLI)-Vise-Ministra Solidariedade Sosiál no Inkluzaun (MSSI), Signi Candrawati Verdial, informa, Governu koordena ona ho Banku Nasionál Komérsiu Timor-Leste (BNCTL, sigla portugés) hodi halo pagamentu ba idozu no ema ho difisiente fulan ne’e nia laran.

“Relasiona ho subsídiu ba idozu no ema ho difisiente sira, atu informa katak tuir oráriu sei halo pagamentu iha loron 20 juñu,” Vise-Ministra hateten, iha Parlamentu Nasionál, segunda ne’e.

Governante klarifika, Governu la kansela pagamentu, maibé adia de’it tanba sei koordena ho entidade relevante hodi haree didi’ak mekanizmu implementasaun pagamentu tanba daudaun iha ámbitu Serka Sanitária ligadu ho COVID-19.

“Dadaun ne’e halo diskusaun ho Ministériu Administrasaun Estatál hamutuk ho Xefe suku no tékniku sira, ho koordenasaun Sentru Integradu Jestaun Krize hodi haree munisípiu ne’ebé mak iha risku boot ba COVID-19 sei halo jestaun interna atu limita pagamentu, katak kada loron normalmente bele selu ema 300 to’o 400, maibé ho situasaun agora limita ba 200,” nia akresenta.

Iha parte seluk Ministériu Solidariedade Sosiál no Inkluzaun (MSSI) halo koordenasaun ho BNCTL no esforsu atu labele iha atrazu, nune’e iha loron ne’ebé termina bele realiza pagamentu.

Iha fatin hanesan, Ministru Koordenadór Asuntu Ekonómiku (MKAE), Joaquim Amaral dehan, jestór BNCTL infetadu COVID-19 no daudaun ne’e sei kumpre kuarentena, tanba ne’e  deside adia pagamentu.

“Informasaun ne’ebé sirkula katak kansela, maibé atu klarifika katak ne’e iha relasaun ho ita-nia kontestu atuál iha ámbitu Serka Sanitária. Kuaze maioria jestór BNCTL infetadu COVID-19 hotu, ne’ebé daudaun kumpre izolamentu hela, tanba ne’e sira husu adia, ne’ebé la’ós kansela,” Ministru klarifika.

Ministru fó ona instrusaun ba jestór banku hodi halo koordenasaun ho MSSI atubele realiza pagamentu iha tempu badak.

Institutu Nasionál Seguransa Sosiál (INSS) submete ona dadus idozu hamutuk 94.000 ba BNCTL.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here