Tribunal Munisípiu Covalima. Imajen Facebook

DILI, 15 juñu 2021 (TATOLI)—Ho limitasaun karreta operasionál, difikulta serbisu Defensoria Públika munisípiu Covalima, liuliu dezlokasaun defensór sira hodi atende sidadaun iha julgamentu móvel.

Defensór Públiku Jerál, Câncio Xavier, informa reprezentasaun serbisu defensoria Covalima, iha karreta operasionál hamutuk rua, maibé antes ne’e ida hetan asidente no labele halo operasaun, no hela ida maibé iha semana kotuk halo hela manutensaun iha Dili.

Notísia relaventa:Defensoria Públika fó de’it asisténsia ba kazu urjente

Câncio Xavier, hatutan karreta rua ne’e mak baibain tula defensór-sira atu kobre julgamentu móvel to’o  munisípiu Bobonaro no fatin seluk, hodi hakbesik justisa ba sidadaun.

“Maibé, semana hirak liu-ba tama iha manutesaun, difikulta tebes atu transporta defensór, nune’e bainhira julgamentu móvel iha Maliana, defensór-sira la konsege marka prezensa tanba karreta laiha, ne’ebé marka de’it prezensa hosi juiz no prokuradór,”Cânçio Xavier, hateten ba jornalista Agência Tatoli iha nia kna’ar-fatin, Quintal Boot, Dili, tersa ne’e.

Maski nune’e, Câncio Xavier kontinua halo esforsu atu bele aselera lalais manuntesaun ba karreta ne’e, no koordena ho tékniku-sira inklui orienta ona parte finansa hodi koordena mós ho parte aprovizionamentu Ministéiru Justisa, nune’e bele rezolve iha tempu badak.

Oras ne’e-daudaun karreta operasionál ne’ebé ativu iha  Serbisu Defensoria Dili iha karreta haat, Baucau rua, Covalima rua, ida funsiona ho ida seluk sei halo manutensaun no Oe-Cusse ida.

Karreta hirak ne’e maioria produsaun 2009 ho modelu Toyota ne’ebé koloka ba munisípiu-sira, dalaruma halo manutensaun gastu barak liu, no karreta tolu mak produsaun iha 2011 ho 2013, ne’ebé kondisaun di’ak hela.

Iha planu 2021, parte defensoria publika propoin orsamentu atu sosa tán karreta balun, maibé la hetan aprovasaun tanba Ministériu Justisa no Governu-rasik iha nesesidade seluk atu bele responde prioridade.

Defensoria hala’a misaun atu fó asisténsia judisiál no estra-judisiál ba sidadaun, tanba ne’e serbisu defensoria hanesan serbisu sosiál fó asisténsia jurídika no estra-judisiál ne’ebé garante iha artigu 135 Konstituisaun Repúblika Demokrátika Timor-Leste, ne’ebé esensiál hodi salva guarda direitu lejítimu sidadaun-sira.

Tuir dadus, iha trimestre dahuluk hosi janeiru to’o marsu tinan ne’e, serbisu defensoria públika fó asisténsia jurídika ka legál ba prosesu kazu foun hamutuk 484, kompostu hosi kazu krime 387 no kazu sivíl 97.

Hosi númeru krime ne’ebé rejistadu, maioria ofensa integridade fizíka simples, violénsia doméstika no prosesu sivíl maka disputa rai.

Asisténsia legál defensoria públika ba sidadaun hasoru prosesu justisa, hanesan julgamentu iha Tribunál, julgamentu móvel, primeiru interrogatóriu no mediasaun-sira.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here