Defensor Públiku Jerál, Câncio Xavier. Imajen Tatoli/Nelson de Sousa

DILI, 22 marsu 2021 (TATOLI)-Iha ámbitu implementasaun serka sanitária no konfinamentu domisiliáriu iha munisípiu Dili ho Baucau, Servisu Defensoria Públika fó de’it asisténsia ba kazu ho karakter urjente.

Defensór Públiku Jerál, Câncio Xavier, hateten defensór sira sei halo de’it atendimentu ba kazu sira urjente hanesan primeiru interrogatóriu, julgamentu kontinuasaun ba dadur hosi prizaun ba tribunál, sumáriu ho prosesu kautela ba prosesu sivíl, maibé ba atendimentu normál ba asisténsia sira seluk sei suspende tanba iha hela situasaun iha serka sanitária.

Notísia Relevante : Serka sanitaria, TDD atende de’it kazu urjente

Ba Agência Tatoli, segunda ne’e, iha nia serbisu fatin,  iha Dili, Câncio Xavier, hateten bainhira sidadaun no Tribunál komunika ho defensoria kontinua fó asisténsia direitu lejítimu.

Defensoria Públika fahe turnu ba defensór no ofisiál justisa sira, nune’e bainhira iha atendimentu urjente ruma iha hodi bele fó asisténsia ba julgamentu sira la’o iha Tribunál.

Espesialista Brazil sei apoiu servisu defensoria

Oportunidade ne’e, Câncio Xavier, informa mós katak Defensoria Públika Jerál hosi Brazil finaliza ona prosesu edital hodi selesiona espesialista na’in-rua nu’udar defensór atu mai Timor-Leste atu apoiu servisu balun iha área justisa, espesialmente iha Defensoria Públika Jerál no Sentru Formasaun Jurídika no Judisiál  (CFJJ) Timor-Leste.

Iha loron 07 juñu  2020, Ministru Justisa Manuel Cárceres da Costa ho Embaixada  Brazil iha Dili, asina ona nota entendimentu ho Ajénsia Brazileira ba kooperasaun (ABC-siglá portugés) hodi kontinua halo estensaun ka aumenta ba kooperasaun oitavu etapa 2021-2023.

Akordu kooperasaun ba oitavu etapa ne’e, Brazil sei fornese espesialista nain-rua; ida sei koloka iha Sentru Formasaun Jurídika no Judisiál (CFJJ)  apoiu formasaun ba defensor no na’in-ida sei koloka iha Defensoria Públika.

Defensor Públiku Jerál, Câncio Xavier, hateten, espesialista sira ne’e sei fó servisu asesoria ba Defensoria Jerál liu-liu ba servisu inspetoria, oinsá hetan referénsia Brazil nian atu funsiona di’ak liután.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here