Membru PNTL akompaña hela atividade tranzasaun negosiante sira iha pontu entrada Tasi-Tolu, sesta (19/3/2021) Imajen Tatoli/Antonio Gonçalves.

DILI, 15 juñu 2021 (TATOLI)—Polísia Nasionál Timor Leste (PNTL) munisípiu Dili, bandu negosiante ambulante-sira atu labele hala’o atividade negósiu liuliu fa’an roupa Obralan (OB), iha área pontu estrada-sira hanesan Tasi-tolu João Paulo II, Manleuana no Metinaro.

Komandante Polísia munisípiu Dili, Superintendente Xefe, Henrique da Costa, husu ne’e tanba tuir observasaun no identifikasaun hatudu katak, negosiante sira balun aproveita hodi faan fali roupa iha fatin hirak ne’ebé mensiona.

Notísia relevante:PNTL Dili estabelese postu provizóriu iha pontu entrada haat

Nia esplika, pontu entrada-sira ne’e, komunidade utiliza hodi hala’o de’it transaksaun ba sasán nesesidade bázika hosi Dili ba munisípiu no hosi munisípiu tama mai Dili.

“Ita identifika iha postu fronteira-sira, hanesan Tasi-tolu no Manleuana ita-nia komunidade dala ruma uza oportunidade ba fa’an fali roupa obralan,” Superintendente Xefe, Henrique da Costa hateten ba jornalista-sira iha Komandu PNTL, Caicoli, tersa ne’e.

Bainhira halo tiha identifikasaun, polísia-sira iha terrenu sosializa kedan regra hodi bandu sira atu labele halo atividade negósiu iha fatin siran-ne’e, tanba lei la permite, no komunidade mós kumpre.

PNTL Dili mós fó hanoin nafatin katak, fatin atu ba fa’an roupa obralan Governu prepara ona iha Merkadu Manleuana no Merkadu Taibesi.

Komandu PNTL antes ne’e hasai ona regulamentu ba negosiante-sira atu fa’an modo, aifuan, ai-maran no sasán nesesidade bázika-sira seluk iha segunda, kuarta no sesta, hahú tuku 6:00 to’o tuku 10:00 otl.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here