Membru PNTL hala'o hela seguransa iha pontu entrada Tasi-tolu, sesta, (19/03/21). Imajen Tatoli/António Gonçalves.

DILI, 31 maiu 2021 (TATOLI)—Polísia Nasionál Timor-Leste (PNTL) munisípiu Dili estabelese postu provizóriu iha pontu entrada haat hanesan, Tasi-tolu, Metinaro, Lahane no Kasnafa-Manleuana.

Estabelesimentu postu provizóriu haat ne’e hodi kontrola movimentu abitante durante periúdu Estadu Ermerjénsia, Serka Sanitária no Konfinamentu Domisiliáriu.

Notísia relevante:PNTL detein abitante 79 ne’ebé dezvia hosi Dili atu ba munisípiu

Segundu Komandante PNTL Dili, Superintendente Polísia, Euclides Belo, hateten durante ne’e PNTL monta de’it lona iha postu integradu haat ne’e, ne’ebé oferese hosi doadór-sira no utiliza hosi ekipa konjunta PNTL, Ministériu Saúde no Bombeiru.

Ho kondisaun ne’e maka, Komandu Jerál PNTL deside ona atu halo konstrusaun ba edifísiu simples iha tempu badak, tanba lona ne’ebé iha, la aguenta ho udan, anin no loron-manas.

“Postu haat ne’e ita konstrui atu integra polísia hosi munisípiu Liquiça iha Tasi-tolu, Aileu iha Casanafa-Maleuana no Lahane inklui Manatuto integra iha Metinaro,” Euclides Belo, hateten ba jornalista-sira iha Komandu PNTL, Caicoli, segunda ne’e.

PNTL sei la tolera abitante ne’ebé halo viazen ilegál hosi Dili ba munisípiu, bainhira detetadu sei detein no prosesa tuir lei.

Antes ne’e, PNTL munisípiu Dili, detein abitante na’in 13 kompostu hosi mane 12 no feto ida hosi Dili, ne’ebé tenta dezloka ba munisípiu iha parte Leste-nian iha kalan boot.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here