Membru PNTL hala’o patullamentu tama-sai bairru iha Dili, hodi asegura komunidade durante situasaun serka sanitária, kuarta (12/05/21). Imajen Tatoli/António Gonçalves.

DILI, 15 juñu 2021 (TATOLI)—Polísia Nasionál Timor Leste (PNTL) munisípiu Dili, rejista kazu krime hamutuk 151 iha área juridisaun munisípiu Dili, durante maiu 2021.

Komandante Polísia munisípiu Dili, Superintendente Xefe, Henrique da Costa, hateten kazu hirak-ne’e rejista aas liu iha eskuadra PNTL Dom Aleixo.

Notísia relevante:Konfrontu iha Surikmas, PNTL detein joven na’in-tolu

“Hosi númeru kazu ne’ebé rejistadu ho kategoria asalta-malu entre grupu joven, tuda-malu, tuda uma no violénsia doméstika,” Superintendente Xefe, Henrique da Costa hateten ba jornalista-sira iha Komandu PNTL, Caicoli, tersa ne’e.

PNTL Dili mós rejista kazu asidente trafégu hamutuk 49, ne’ebé rezulta vítima na’in-rua mate no kanek todan na’in 19 no kanek kamán 52.

Iha dadus hatudu katak, eskuadra Polísia Ataúro no Metinaro la rejista kazu krime no konsidera postu seguransa rua livre hosi kazu ne’ebé mantein seguransa ba populasaun.

“Durante fulan maiu, eskuadra Ataúro la rejista kazu ka zero no eskuadra Metinaro rejista kazu ida de’it,” nia subliña.

Entretantu, iha fulan abríl PNTL Dili rejista kazu krime hamutuk 89 ne’ebé maioria akontese iha eskuadra Dom Aleixo, Vera Cruz, Cristo Rei, nune’e mós eskuadra Ataúro no Metinaro zero kazu la rejista kazu ruma.

PNTL Dili sei kontinau serbisu hamutuk ho autoridade suku liu hosi prezensa Ofisiál Polisia Suku (OPS) no Konsellu Polisiamentu Komunitária (KPK), hodi hala’o serbisu konjunta atu garante Dili sai fatin seguru ba ema hotu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here