Membru PNTL munisípiu Dili, hala'o hela sensibilizasaun kona-bá prevensaun COVID-19, ba negosiante iha área Aimutin, Dili (19/03/21). Imajen Tatoli/António Gonçalves.

DILI, 10 maiu 2021 (TATOLI)—Polísia Nasionál Timor Leste (PNTL), Komandu munisípiu Dili, detein joven na’in-tolu ne’ebé deskonfia nu’udár autór hodi provoka konfrontu entre grupu joven iha área Surikmas no aldeia Haburas, suku Bairru-Pité, postu administrativu Dom Aleixo, munisípiu Dili.

Portavóz Komandu Jerál PNTL, Superintendente Xefe, Arnaldo de Araújo, informa tuda malu entre grupu joven ne’ebé akontese iha 08 maiu kalan, rezulta uma komunidade balun inklui karreta PNTL ida hetan estragu.

Notísia relevante:PNTL detein joven na’in-haat deskonfia tuda rahun ambulánsia

Joven na’in-tolu  ne’ebé PNTL detein ho inisiál JMV, DAV no RCG ho asaun flagrante delito, bainhira membru polísia halo atuasaun ba akontesimentu ne’e.

“Tuda malu entre grupu rua iha área Surikmas no aldeia Haburas, rezulta uma no karreta PNTL ida ne’ebé ba halo atasaun mós hetan tuda. Kalan ne’e kedan, PNTL detein DAV, JMV no RCG,” Superintendente Xefe, Arnaldo de Araújo hateten ba jornalista-sira iha Komandu Jerál PNTL, Caicoli, segunda ne’e.

PNTL mós halo ona investigasaun ba kazu ne’e, no deskobre katak, akontese tanba problema partikulár entre joven balun, to’o hada’et ba grupu.

Joven na’in-tolu ne’e, oras-ne’e deudaun sei kontinua detein iha sela polísia Komandu PNTL Dili, hodi hein prosesu ba Ministériu Públiku (MP).

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here