Matebian Custódio António de Fátima Pascoal ne’ebé ema deskoñesidu baku to’o mate iha aldeia Samelaun, Suku Ritabou, postu administrativu Maliana-Vila, munisipiu Bobonaro. Imajen/PNTL.

DILI, 14 juñu 2021 (TATOLI)—Ema deskoñesidu baku joven mane ida ho naran Custódio António de Fátima Pascoal (21), iha aldeia Samelaun, suku Ritabou, postu administrativu Maliana-Vila, munisípiu Bobonaro, to’o kanek grave.

Xefe Suku Ritabou, Maximiano dos Santos de Araújo, via telefónika, hateten kazu ne’e akontese iha segunda 07 juñu 2021, madrugada tuku 1:00 otl.

Notísia relevante:Kazu Lahane, MP akuza arguidu ho krime tolu

“Custódio hetan baku bainhira hamutuk ho-nia kolega balun viazen hosi uma, la’o ba aldeia Samelaun, derrepente hetan ataka hosi grupu deskoñesidu, hodi lori besi baku matebian nia-isin lolon monu ba rai ho kondisaun sofre kanek grave,” Maximiano dos Santos de Araújo hateten, segunda ne’e.

Hafoin akontesimentu, nia hatutan, joven balun hosi parte vítima mós halo kedan asaltu hodi baku rahun uma haat, inklui karreta kamioneta ida ne’ebé deskonfia hosi parte suspeitu, ne’ebé envolve mós hodi baku vítima.

Autoridade lokál ne’e konta tuir katak, hafoin grupu deskoñesidu ne’e  baku vítima to’o monu, família evakua kedan vítima ba Ospitál Maliana, hodi hala’o tratamentu saúde no kontinua transporta vítima ba Ospitál Nasionál Guido Valadares (HNGV sígla portugés), maibé la konsege salva, tanba sofre kanek grave no hakotu-iis iha sesta (11/06).

Nune’e, iha domingu (13/06), família akompaña hosi parte Polísia Nasionál Timor Leste (PNTL), transporta ona matebian ba nia-moris fatin suku Ritabou, postu administrativu Maliana.

“Ita seidauk indentifika loloos autór-sira, tanba ita-nia autoridade seguransa sei hala’o hela investigasaun profunda, hodi buka-tuir suspeitu-sira, tanba ita seidauk hatene suspeitu ne’e,” nia informa.

Hanesan autoridade lokál, husu ba autoridade seguransa hodi kaptura suspeitu-sira ne’ebé envolve iha kazu krime omesídiu ne’e, no evita atu labele akontese tan iha futuru.

Kona-bá vítima ne’ebé uma hetan estragu iha aldeia Samelaun, PNTL evakua provizóriu iha Komandu PNTL Maliana, hodi evita problema.

Matebian Custódio António de Fatima Pascoal, nu’udár oan ba daruak hosi maun-alin na’in-tolu hosi aman Arlindo de Fátima Pasqual ‘Abe-Magun’, inan Esperança Serafina Fraga, ne’ebé hela tinan barak iha suku Ritabou.

Arlindo de Fatima Pasqual ‘Abe-Magun’, husu ona ba PNTL atu investiga kazu ne’e, hodi buka-tuir suspeitu-sira ne’ebé óho nia oan no prosesa tuir Lei.

Ohin, Portavóz Komandu Jerál PNTL, Superintendente Xefe, Arnaldo de Araújo, hateten Komandu PNTL Maliana lideradu hosi Komandante Bobonaro, Superintendente Polisia, António ‘Mauluta’ ho ekipa halo ona investigasaun ba kazu ne’e hodi buka-tuir suspeitu-sira.

“Kazu ne’e agora ita-nia Polísia Maliana halo ona investigasaun, hodi buka-tuir autór-sira ne’ebé partisipa hodi hamate vítima. Sei buka-tuir hodi kaer hotu atu prosesa tuir Lei,” nia hateten.

Tuir planu, parte família sei hala’o serimónia funerál iha semitériu Santa Cruz, Maliana, Bobonaro, ohin.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here