Prezidente Institutu Nasionál Seguransa Sosiál (INSS), Longuinhos Armando. Imajen Tatoli/Osória Marques.

DILI, 02 juñu 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, informa INSS verifika ona dadus entidade empregadór-fakultativu hamutuk 6.707 ne’ebé rejistu ba programa “apoiu ba empregu”.

Notísia Relevante: Dadus provizóriu “apoiu ba empregu” iha territóriu nasionál hamutuk 5.095

“Dadus entidade empregadór-fakultativu iha munisípiu Dili hamutuk 6.707 ne’e, INSS verifika ona. Hosi dadus ne’e, ita-nia entidade empregadór hamutuk 1.623 no fakultativu hamutuk 5.084,” Longinhos Armando Leite hateten ba Agência TATOLI iha nia knaar fatin, Caicoli, Dili, kuarta ne’e.

Nia hatutan, entidade empregadór no fakultativu iha territóriu nasionál ne’ebé hakarak adere ba seguransa sosiál ne’e, sira-nia dokumentu iha ona INSS ne’ebé seidauk verifika ne’e hamutuk 2000-resin.

Bainhira INSS verifika hotu ona dadus hirak ne’e mak sei halo pedidu ida ba fundu COVID-19 nian para sira bele transfere osan mai iha INSS nia konta bankaria, mak foin bele halo pagamentu.

Entretantu, Prezidente INSS ne’’e apela ba empreza no traballadór tuan sira-ne’ebé daudaun ne’e sei rejistu iha INSS ne’e tenke kumpre regra ne’ebé Governu liuhosi Ministériu Saúde (MS) no Organizasaun Mundiál Saúde (OMS) aplika, atu nune’e bele evita moras COVID-19 ne’e da’et ba ema seluk.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here