Kondisaun uma komunidade iha aldeia Moris Foun, Tasi-tolu kauza hosi inundasaun iha 04 abríl. Imajen Tatoli/Eugénio Pereira.

DILI, 14 juñu 2021 (TATOLI)—Uniaun Europeira (UE) ho Care Internasional, asina akordu ho Sekretária Estadu Protesaun Sivíl (SEPS), hodi oferese fundu €100.000 ba Governu Timor-Leste, atu bele tulun vítima dezastre naturál.

Serimónia asinatura ne’e hala’o hosi Embaixadór UE iha Timor-Leste, Andrew Jacobs, Diretór Care Internásional, Peter Goodfellow, Diretór Jerál SEPS, Superientende Polísia, Ismael Babo, iha salaun SEPS, Caicoli, segunda ne’e.

Notísia relevante:SEPS kontinua verifika dadus ba apoiu materiál konstrusaun

Fundu ne’e oferse direta hosi UE no Care internasional mak sei jere, iha implementasaun sei serbisu hamutuk ho SEPS ne’ebé sei  halo fila-fali akizasaun ba materiál konstrusaun, nune’e distribui ba vítima dezastre naturál ho nia alvu liu-liu ba  família vuneravél, inkluzaun feto, labarik feto, no ema ho defisiénsia hamutuk  200 iha Dili.

Care Intermasional sei uza revista Lafaek ne’ebé prodúz informasaun kona-bá hasa’e konsiénsia ba importánsia prevensaun dezastre naturál ne’ebé sei to’o ba uma-ka’in 103.000 iha área rurál iha munisípiu 13.

Embaixadór UE, Andrew Jacobs, hateten apoiu ne’e  atu fó ba família-sira hodi rekopera hosi inundasaun, oinsá harii uma ne’ebé seguru, garante inkluzaun feto, labarik feto, no ema ho defisiénsia hodi asegura katak, ema hotu-hotu presiza uma mahon.

Diplomata ne’e rekoñese katak, mudansa klimátika sai grave liu tanba degradasaun ambientál, aleinde hasoru risku naturál ne’ebé maka’as no bele hamosu dezastre, mudansa klimátika no degradasaun ambientál, sai mós hanesan kauza hosi konflitu, inseguransa ai-han no dezlokamentu.

“Ne’e inisiativa di’ak ida hodi introdús atividade sira hanesan koñesimentu kona-bá bee sa’e no sensibilizasaun kona-bá risku ba membru komunidade-sira iha munisípiu 13 liu hosi Care nia revista edukasaun Lafaek,’’ Andrew Jacobs, hateten iha nia diskursu.

Nune’e mós Diretór Nasionál Care Internasional, Peter Goodfellow, promete atu fó apoiu  ba SEPS hodi garante katak, família vulnerável-sira ne’ebé afetadu hosi inundasaun bele fila ba uma ho seguru.

“Familia barak mak sei iha risku ba bee sa’e iha futuru no rai-halai, no ami sente orgullu hodi serbisu hamutuk ho Uniaun Europeia atu hamenus vulnerabilidade família sira nian ba dezastre iha futuru liuhusi téknika konstrusaun ne’ebé di’ak liu ba reziliénsia uma sira,’’ nia  hateten.

Diretór Jerál SEPS, Ismael Babo, lori Governu nia naran agradese ba apoiu ne’e tanba sei bele tulun família afetadu-sira iha situasaun difisíl.

Programa ajuda umanitária hosi Komisaun Europeia Departamentu Apoiu Umanitária hosi Komisaun Europeia (ECHO), liuhosi finansiamentu ba asaun ida-ne’e, ninia objetivu atu harii fila-fali protesaun ba komunidade ne’ebé hasoru inundasaun ne’ebé makaas.

Care Internasional serbisu iha TL desde 1994, foka ba resposta umanitária no projetu dezenvolvimentu sustentável ba tempu naruk iha agrikultura no redusaun risku dezastre, edukasaun, saúde komunitáriu no nutrisaun, saúde reprodutiva no saúde inan-nian, no feto sira-nia partisipasaun inklui igualdade jéneru.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here