Edifísiu Eletrisidade Timor Leste (EDTL) Bobonaro, Imagen Tatoli/Sérgio da Cruz.

BOBONARO, 14 juñu 2021 (TATOLI)—Dadus hosi Serbisu Eletrisidade Timor Leste, Empreza Públika (EDTL,E.P), munisípiu Bobonaro, to’o 2021, populasaun hosi munisípiu ne’e hamutuk 15.834 mak asesu ona eletrisidade.

“Totál populasaun ne’ebé asesu ona enerjia elétrika hamutuk 15.834, no balun seidauk asesu,” Supervizór EDTL,E.P Bobonaro, Mário de Jesus Soares, hateten ba jornalista iha serbisu fatin, segunda ne’e.

Notísia relevante:Fulan lima, SMASA Bobonaro rekolla reseita $10.056,75

Parte EDTL,E.P Bobonaro prontu fornese enerjia elétrika durante oras 24, maibé kliente-sira tenke hola pulsa no selu taxa.

“Kliente ne’ebé la selu taxa durante fulan tolu, tékniku-sira sei tesi-kotu fiu, no ba rejistu fila-fali iha edifísiu mak foin bele halo fali instalasaun foun,” Mário de Jesus Soares, dehan.

Aplikasaun multa, kliente-sira ne’ebé halo ligasaun ilegál sei selu $500 to’o 2.000 ne’ebé aplika ba kliente normál, no $2.000 to’o 25.0000 aplika ba kliente komersiál.

Parte EDTL,E.P Bobonaro mós iha ona dadus komunidade ne’ebé halo ligasaun ilegál ne’ebé hato’o hosi tékniku no autoridade lokál-sira, ne’ebé iha tempu badak sei halo intervensaun atu aplika multa tuir Lei.

Mário de Jesus Soares  husu ba kliente-sira, labele halo ligasaun ilegál, tanba bele afeta ba vida komunidade liuliu bele akontese inséndiu inklui fó prezuizu ba Estadu.

Hahú hosi janeiru to’o maiu EDTL,E.P Bobonaro hatama reseita ba kofre Estadu, hamutuk $6.051,36, mai hosi kliente foun ne’ebe halo ligasaun hamutuk 3.306, kliente kontadór konvensionál postpago hamutuk $2.745,36.

Tuir sensus uma-ka’in tinan 2015, munisípiu Bobonaro iha populasaun hamutuk 97.762, mai hosi postu administrativu neen, hanesan Atabae, Balibó, Bobonaro, Cailaco, Lolotoe no Maliana, ho uma-ka’in 18.575,  ho-nia suku hamutuk 50.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here