Plaka Serbísu Munisipál Áqua Sañeamentu no Ambiente, Bobonaro. Imajen Tatoli/Sérgio da Cruz.

BOBONARO, 08 juñu 2021 (TATOLI)—Hahú hosi fulan janeiru to’o maiu 2021, Serbísu Munisipál Áqua Sañeamentu no Ambiente (SMASA), Munisípiu Bobonaro, hatama reseita doméstika hamutuk $10.056,75 ba kofre Estadu.

Diretór SMASA munisípiu Bobonaro, Adriano da Cruz, hateten, reseita ne’e mai hosi kustu aministrasaun kliente foun-sira no tabela tarifaria bee moos, inklui sira ne’ebé halo ligasaun foun ba bee moos.

Notisia relevante:OJE 2021, Bobonaro ezekuta ona 27.65%

“Populasaun Maliana hamutuk rihun 14 mak ssesu ona bee moos. Maibé, iha barak mak seidauk asesu  tanba planu ne’ebé submete seidauk hetan aprovasaun,” Adriano da Cruz, hateten  ba jornalista Agência Tatoli, iha edifísiu SMASA Soso, Maliana, tersa ne’e.

Hahú hosi juñu to’o dezembru 2019, kliente foun ne’ebé rejistu ba ligasaun bee moos hamutuk ema na’in 81, iha 2020 kliente hamutuk 151 no hosi janeiru to’o maiu 2021, kliente hamutuk na’in 34.

Reseita ne’ebé hatama ba kofre Estadu, hahú hosi 2018 to’o 2020 hamutuk $36.777,49 no hahú hosi janeiru to’o maiu 2021 hamutuk $10.056,75.

Bazeia ba rezultadu sensus uma-kain 2015, populasaun iha postu adminístrativu Maliana ne’ebé hela iha área 237 km2, hamutuk 28.908, kompostu hosi feto 14.370 no mane 14.538 ho uma-ka’in 4.942.

Númeru ne’e la konta ho postu administrativu Lolotoe, Cailaco, Bobonaro, Balibo no Atabae.

Komunidade tenke uza bee ho kuidadu

Adriano da Cruz mós husu komunidade ne’ebe hela besik tanki rezervatóriu, atu utiliza bee ho konsiénsia no kuidadu, komunidade Maliana tomak konsumu bee ne’e no obrigadu tenke selu liu hosi númeru konta Banku Nasionál Komérsiu Timor Leste (BNCTL sígla portugés).

Nia husu ne’e tanba tempu bai-loron, fornesimentu be’e moos ba komunidade iha Maliana depende ba volume hosi bee-matan.

“Fornesimentu bee moos iha tempu bai-loron, ita uza sistema bomba, tamba volume bee hosi unidade lima ne’e menus,” Adriano da Cruz, hateten.

Diretór ne’e esplika, sistema bomba atu fornese bee mai tanki rezervatóriu kleur oitoan, tanba ne’e operadór-sira loke loron rua dala ida.

Tanba ne’e, SMASA iha ona planu atu konstrui uma ba operadór-sira besik bee-matan, atu bele asegura no garante distribuisaun bee tuir oras.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here