iklan

BAUCAU, COVID-19, HEADLINE, MUNISÍPIU, SAÚDE

Lansa vasina doze daruak, PAM Baucau enkoraja hatutan informasaun

Lansa vasina doze daruak, PAM Baucau enkoraja hatutan informasaun

Prezidente Autoridade Munisípiu Baucau, Olívio 'Bou Lesa' Freitas. Imajen TATOLI/Natalino Belo

BAUCAU, 14 juñu 2021 (TATOLI)—Ekipa liña frente munisípiu Baucau, ohin hahú partisipa iha kampaña vasinasaun AstraZeneca doze daruak, ne’ebé realiza iha Hospital Regional Eduardo Ximenes (HorEX) Villa nova, Baucau.

Iha diskursu, Prezidente Autoridade Munisípiu (PAM) Baucau, Olívio ‘Bou Lesa’ Freitas, enkoraja entidade tomak, hafoin ramata simu vasina doze daruak, bele hatutan informasaun kona-ba importánsia vasina kombate COVID-19.

Notísia relevante: 14 juñu, hahú vasina AstraZeneca doze daruak iha Baucau

“Espera katak ita sei habelar informasaun vasina ne’ebé ita simu ona, bele hato’o ba ita-nia maluk sira atubele mai simu vasina ida-ne’e, hafoin vasina ne’e, ita bele habelar fali,” PAM Baucau hateten iha HorEX, segunda ne’e.

Vasina doze dahuluk realiza ona no ninia benefísiu mak hasa’e imunidade hodi proteje ita-nia-an, tanba ne’e bainhira kompleta ona simu vasina doze daruak, tuir desizaun Governu bele halo movimentu livremente iha territóriu tomak sein halo teste.

Notísia relevante: Governu deklara sidadaun simu vasina kompleta livre sirkulasaun sein teste

“Labele fiar rumores ne’ebé lansa iha públiku relasiona ho movimentasaun iha Timor-Leste hafoin simu vasina, tamba ita-nia país Demokrátiku ne’e, iha ema balun hakarak halo propoganda atu desakredita VIII Governu, maibé ita labele fiar,” nia akresenta.

Seremónia kampaña vasinasaun AtraZeneca doze daruak ne’e partisipa hosi PAM Baucau, eis PAM, António Guterres, Primeiru Komandante Polísia munisípiu Baucau, Superintendente Xefe Armando Monteiro, Diretór Saúde Baucau, Domingos Guterres, Komandante Komponente Terrestre Primeiru Batallaun, Tenente Koronél Rineldi Cortereal e Silva, inklui ekipa liña frente sira.

Tuir meta, vasina doze daruak rasik sei hala’o durante semana ida, maibé antes ne’e kontinua doze dahuluk ba ema komorbidade no idozu.

Notísia relevante: SSMB fó prioridade vasina ba komorbidade no idozu iha Baucau

Entretantu, tuir dadus, ekipa liña frente ne’ebé sei simu vasina doze daruak iha Baucau hamutuk 2.018 hosi doze 1.322 nee’ebé distribui ona.

Jornalista: Natalino Belo

Editora: Julia Chatarina

iklan
iklan

Leave a Reply

iklan
error: Content is protected !!