Serimónia lansamentu vasina Sinovac doze dahuluk, iha kampus UNTL, segunda (14/06/21). Imajen Tatoli/Egas Cristóvão.

DILI, 14 juñu 2021 (TATOLI)—Governu liu hosi Ministériu Saúde (MS), halo lansamentu ba vasina Sinovac ba postu ualu ne’ebé prioridade ba estudante, professór no komunidade xineza iha Timor-Leste (TL).

Postu ualu ne’ebé MS tau prioridade mak hanesan, Universidade Nasionál Timor Lorosa’e (UNTL), Institute Off Bussines (IOB), Dili Institute Of technology (DIT), Sekretária Estadu Joventude no Desportu (SEJD), Asosisaun xineza iha Fatuhada, Hudi-laran, Ai-mutin inklui Klínika Fatumeta.

Notísia relevante:Governu sei lansa vasina Sinovac iha 14 juñu

”Ita-nia planu ba vasinsaun ida-ne’e ho durasaun semana ida iha Dili. Ita la distribui ba munisípiu-sira tanba atividaade ne’ebé iha, ita tenki kobre hotu uluk iha Dili. Bainhira la konsege kobre, posibilidade sei distribui ba munispiu,” Diretora Jerál Prestasaun Serbisu Saúde, Odete da Silva Viegas, hateten ba jornalista-sira iha kampus, UNTL, segunda ne’e.

Odete da Silva Viegas, esplika efeitu hosi vasina Sinovac hanesan ho vasina AstraZeneca, maibé diferente maka vasina Sinovac bele hetan ona doze daruak iha semana haat nia laran, no AstraZeneca tenke hein to’o semana ualu.

Nia mós informa katak, profisionál saúde ne’ebé treinadu ba vasina iha nível territóriu hamutuk 1.736.

Númeru ne’e kompostu hosi médiku, enfermeiru, parteira no mós tékniku aliadu no tékniku administrative-sira.

Ho vasina Sinovac MS aumenta tán rekursu umanu hamutuk na’in 75, hodi haree ba vasina Sinovac ne’e rasik iha munisípiu Dili.

Iha fatin hanesan, Embaixadór Xina iha Timor Leste, Xiao Jianguo, konsidera apoiu ne’ebé Governu Xina oferese hanesan prezente id aba povu ida-ne’e tuir pedidu Primeiru Ministru (PM), Taur Matan Ruak.

”Ha’u espera katak, liu hosi vasina ida-ne’e bele hametin liu tán ita-nia relasaun. Tanba vasina ida-ne’e  hanesan prezente ida ba Timor-Leste,” Xiao Jianguo, hateten.

Iha serimónia lansamentu ne’e, membru Governu balun hamutuk ho estudante, profesór no komunidade xineza mak simu kedan vasina Sinovac.

Tui planu no tarjetu MS nian, sei utiliza vasina Sinovac doze 100.000 ba estudante ho profesór mai hosi eskola públika no privada hamutuk 60.000-resin inklui komunidade xineza iha TL.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here