Embaixadór Uniaun Europeia iha Timor-Leste, Andrew Jacobs. Imajen TATOLI/António Gonçalves

DILI, 14 juñu 2021 (TATOLI)–Embaixadór Uniaun Europeia (UE), Andrew Jacobs, iha segunda ne’e hasoru malu ho Primeiru-Ministru (PM), Taur Matan Ruak, hodi diskute kona-ba preparasaun Eleisaun Prezidensiál ne’ebé sei realiza tinan oin.

Iha ámbitu ne’e, Embaixadór informa ba Xefe Governu katak organizasaun multilaterál ne’e komprometidu apoia Timor-Leste ba realziasaun festa demokrasia.

“Ami-rua Primeiru-Ministru ko’alia mós kona-ba preparasaun Eleisaun Prezidensiál, ne’ebé sei hala’o iha marsu 2022. Uniaun Europeia iha programa observasaun eleitorál iha tinan 2017 no 2018. Ami ko’alia kona-ba posibilidade Uniaun Europeia halo observasaun durante Eleisaun Prezidensiál,” Diplomata ne’e hateten hafoin ramata reuniaun, iha Rezidénsia Farol.

Notísia relevante: Prezidente CNE orienta funsionáriu sira halo preparasaun ba eleisaun prezidensiál 2022

Tuir Embaixadór, UE sempre hakarak apoia hametin demokrasia iha Timor-Leste, liuhosi observasaun ba eleisaun ne’ebé hanesan maneira importante atu hametin prosesu demokrátiku.

“Ami sei apoia Komisaun Nasionál Eleisaun (CNE, sigla portugés) hodi prepara ba eleisaun, sei ko’alia ho Sekretariadu Tékniku Administrasaun Eleitorál (STAE) kona-ba nesesidade orgaun eleitorál ne’e, liuliu asisténsia téknika, tanba Uniaun Europeia disponível apoiu prosesu eleitorál,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here