Prezidente CNE, Alcino Barris. Imajen/TATOLI Egas Cristovao.

DILI, 25 maiu 2021 (TATOLI)—Prezidente Comissão Nacional de Eleições (CNE), Alcino de Araújo Barris, fó orientasaun ba funsionáriu sira-ne’ebé hala’o knaar iha CNE nasionál, iha Munisípiu sira no Rejiaun Administrativa Espesiál Oé-Cusse atu halo preparasaun di’ak ba eleisaun prezidensiál 2022.

Notísia Relevante: 2021: CNE halo preparasaun ba aktu eleitorál, ba eleisaun prezidensiál 2022

“Iha enkontru ne’e, ha’u fo orientasaun ba funsionariu sira hotu ne’ebé halo knaar iha Comissão Nacional de Eleições, tantu nasionál, munisipiu, no RAEOA atu iha preparasaun di’ak ba Eleisaun Prezidensiál ne’ebé sei akontese iha tinan oin,” Alcino de Araújo Barris hateten liuhosi komunikadu imprensa ne’ebé Agência Tatoli asesu, tersa ne’e.

Iha enkontru zoom meeting hamutuk ho sekretariau jeral CNE nasionál inklui diretór no delegadu munisípiu no RAEOA ne’e, Prezidente CNE orienta funsionáriu sira atu kontinua halo akompañamentu ba servisu STAE nian, halo supervizaun ba prosesu resensiamentu eleitorál no atualizasaun baze dadus iha munisipiu no RAEOA, liu-liu halo supervizaun ba fatin hirak ne’ebe STAE sei identifika ba futuru instalasaun sentru no sstasaun votu iha Eleisaun Prezidensiá 2022 nian.

“Papel CNE nian iha prosesu ne’e, atu garante katak sentru no estasaun de votu ne’ebé sei estabelese, iha kondisaun ne’ebé favoravel, bele iha asesu ba eletrisidade no asesu ba estrada, nune’e la difikulta transportasaun materiá sensitivu no la sensitivu, no labele iha fatin ne’ebé lei proibe ka bandu,” Alcino Barris hateten.

Lider Máximu Orgaun Eleitorál ne’e mos solisita ba funsionáiu sira hotu atu kaer konstituisaun RDTL no lei sira ligadu ho prosesu eleitorál iha Timor-Leste nu’udar matadalan ba servisu CNE nian.

Iha fatin hanesan, Prezidente CNE mos orienta ba Diresaun Nasional Asuntu Plenária, Relasaun Públika, no Kooperasaun atu kontinua halo komunikasaun ho UNDP ne’ebé iha inisiativa fó sira-nia apoiu ba Instalasaun Sentru Mídia ka Studio Mini iha Edifisiu CNE, para futuru mai bele transmite informasaun sira hotu ligadu ho Prosesu tomak aktu eleitorál nian iha Timor-Leste.

Tuir palnu CNE nian, iha tempu besik sei realiza mós formasaun ba jornalista sira no inklui mós ba ONG sira nune’e bele iha koñesimentu natoon ba Sistema Eleitorál no Papel ka Kompeténsia Orgaun Eleitorál CNE no STAE.

Partisipante sira-ne’ebé partisipa iha enkontru Zoom Meeting ne’e mai hosi dirijente sekretariadu jerál CNE ho nia dirasaun sira, kargu xefia, funsionáriu nasionál, asesór sira inklui delegadu no diretór CNE sira iha munisípiu no RAEOA.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here