MJ nu’udár ajente Polísia Nasionál Timor-Leste (PNTL), submete ba primeiru interrogatóriu iha Tribunál Distritál Dili (TDD), segunda (07/06/21). Imajen Tatoli/Egas Cristóvão.

DILI, 07 juñu 2021 (TATOLI)—Ministériu Públiku (MP), akuza krime tolu hasoru arguidu ho inisiál MJ  nu’udér ajente Polísia Nasionál Timor-Leste (PNTL), ne’ebé envolve iha kazu tiru mate sidadaun na’in-rua no ida kanek iha aldeia Ainitas-Hun, suku Lahane Osidentál, postu administrativu Vera Crus, munisípiu Dili, sábadu (05/06).

Krime tolu ne’e mak hanesan, omesídiu agravadu rua ne’ebé previstu iha artigu 139 iha kódigu penál Timor-Leste, tanba vítima na’in-rua mate no krime omesídiu tentadu ida, tanba vítima ida kanek.

Notísia relevante:Kazu Lahane, arguidu submete ba primeiru interrogatóriu

Arguidu kumpre ona detensaun iha sela Polísia Sientifika Investigasaun Kriminal (PCIC sígla portugés) durante oras 72, hodi kontinua partisipa iha primeiru interrogatóriu iha Tribunál.

Prosesu primeiru interrogatóriu ne’e, hahú iha tuku 16:00 to’o tuku 17:30 otl, suspende hodi adi’a fila-fali ba tersa aban tuku 14:00 otl hodi rona desizaun.

Tuir informasaun ne’ebé, jornalista Agéncia Tatoli asesu katak, iha alegasaun, MP husu Tribunál atu aplika prizaun preventiva ba arguido, tanba faktu forte involvimentu arguido-nian iha akontesimentu.

Primeiru interrogatóriu ne’e, prezide Juíz singular, Afonso Carmona, Ministéiru Públiku reprezenta hosi prokuradór Jacinto Babo, Hernánio Rangel, arguidu hetan asisténsia legál hosi advogadu privadu, Câncio Freitas, no prosesu primeiru interrogatóriu ne’e taka ba públiku.

RENETIL husu MP halo investigasaun kredível

Rezisténsia Nasionál Estudante Timor-Leste (RENETIL), husu Ministeriu Públiku (MP) hodi hala’o investigasaun ne’ebé profunda, imparsiál no kredível ba kazu ne’e, nune’e kontinua ho julgamentu ba estabelesimentu justisa loloos.

RENETIL husu no kondena makaas, tanba aktu violentu hosi membru PNTL hasoru sidadaun na’in-tolu iha Lahane, konsidera pasoál seguransa la hala’o nia-serbisu atu hametin lei no órden.

Alende ne’e, husu ba Ministériu Interiór (MI) no Komandu PNTL presiza estebelese mekanizmu hodi identifika problema psikolójiku ne’ebé membru ruma hasoru, tanba atu haree membru-sira nia kondisaun trauma iha pasadu ka tanba presaun hosi serbisu lorloron, no hola medida atu apoia membru-sira, nune’e bele rekopera hodi bele hala’o knaar didi’ak.

“Apela ba komunidade atu kalma kontrola an, fó fiar ba autoridade Polísia no instituisaun judisiária hodi hala’o sira-nia serbisu ba hari justisa
loloos iha kazu ne’e,” RENETIL apela liu hosi komunikadu ne’ebé Tatoli asesu, segunda ne’e.

Jornalista: Nelson de Sousa/Arminda Fonseca

Editór: Cipriano Colo

HAKEREK NO HATÁN

Please enter your comment!
Please enter your name here