Labarik na’in-lima (hamriik iha estrada ninin) hola inisiativa-rasik hodi aterru estrada ko’ak-sira ho rai no fatuk. Imajen Tatoli/Sérgio da Cruz

BOBONARO, 13 juñu 2021 (TATOLI)-Haree ba kondisaun estrada ne’ebé ko’ak barak, labarik na’in-lima iha Aldeia Ana-hun, Suku Odomau, Postu Administrativu Maliana, Munisípiu Bobonaro, hola inisiativa-rasik hodi aterru tiha ko’ak-sira ne’e ho rai no fatuk.

Notísia Relevante : Xefe Suku Oe-leu husu Governu konstrui merkadu lokál Ilibole

Labarik na’in-lima ne’e maka hanesan Jualino do Cruz, Domingos da Cruz, Rovinho da Cruz, Jovanio da Cruz, ho Jenevio Monis Daniel. Sira-na’in-haat eskola iha Eskola terseiru síkulu Ana-hun no na’in-ida eskola iha Pre-Sekundáriu Nunutana.

Sira na’in-lima organiza malu lori fatuk no lalin rai, taka-tiha ko’ak-sira iha estrada laran ligasaun Maliana Villa ba Postu Administrativu Bobonaro no Lolotoe.

Labarik na’in-lima nia sakrifisiu ne’e halo ema ua’in; juventude feto-mane ho ferik-katuas sira, ne’ebé utiliza estrada refere ho transporte privadu (motor no karreta) apresia tebes. Nune’e, bainhira utilizadór-sira liuhosi estrada ne’ebé labarik na’in-lima aterru ne’e sempre fó hela osan.

Balun fó $50 centavos no balun fali fó $1.00.  nune’e, bainhira to’o loraik, sira na’in-lima tau hamutuk osan ne’ebé sira hetan hodi fahe malu no lori ba entrega sira-nia inan-aman iha uma.

“Ami na’in-lima tau hamutuk osan ne’e, loraik,  mak fahe-malu depois balun ami lori ba entrega ami nia inan-aman no dala balun ami sosa kedas supermi ka modo ruma hodi ba halo modo ba ami han kalan-nian,” Jenevio Moniz Daniel, labarik ida hosi sira-na’in lima ne’e dada lia ho Agência Tatoli iha Aldeia Ana-hun, domingu ne’e.

Maioria abitante ne’ebé asesu liuhosi estrada ne’ebé labarik na’in-lima aterru ne’e, sempre fó hela osan ba sira. dala ruma, sira tuu hela iha estrada ninin mós ema ne’ebé liu hatene ona no soe hela osan ba sira.

Karidade ne’ebé sira na’in-lima halo hodi aterru estrada ko’ak sira ne’e, la’ós orientasaun hosi ema ruma ka simu orientasaun hosi inan-aman. Maibé sira rasik maka foti inisiativa taba haree ba estada ko’ak barak tebes ne’e bele prejudika movimentu transporte no bele lori risku ba ema nia vida.

Hosi abitante sira-nia voluntarizmu fó osan b labarik na’in-lima ne’e, dala ruma loron ida, sira bele hetan $5.00 to’o $7.00, no abitante-sira ne’ebé utiliza ka liuhosi estrada ne’e hatene sira na’in-lima  ho di’ak tebes.

“Labarik na’in-lima nia karidade aterru estrada ko’ak sira-ne’e ajuda tebes ami lori motór ba mai, tanba tinan barak ona kondisaun estrada ne’e at no prejudika movimentu transporte, liuliu motór,” Justino Pinto, nu’udar motorista hateten.

Nia fó sasin katak durante ne’e sira ho motór liuhosi estrada ne’e sempre para tiha pois dudu de’it, tanba estrada ko’ak boot no ko’ak barak halo motor kose fatuk no rai. Tanba ne’e, bainhira labarik na’in-lima aterru ona ne’e ajuda tebes.

“Ha’u fó sira $50 centavos tanba sira aterru ona estrada ne’e ajuda tebes ita hotu,”  Justino Pinto hateten.

Justino Pinto  espera katak iha tempu badak nia laran Governu, liuliu ministériu relevante bele tau atensaun hodi solusiona tiha kondisaun estrada Maliana Villa ba Bobonaro no Lolotoe, ne’ebé kondisaun ko’ak barak tebes.

Jornalista       : Sérgio da Cruz

Editor             : Francisco Simões

HAKEREK NO HATÁN

Please enter your comment!
Please enter your name here