Merkadu produtu lokál Ilibole. Imajen Tatoli/Sergio da Cruz

BOBONARO, 13 juñu 2021 (TATOLI)-Xefe Suku Oe-leu, Januario Meta-Tae Bragança, husu ba Governu atu konstrui sentru merkadu  lokál ba negosiante ne’ebé fa’an produtu  lokál iha Ilibole.

Notísia Relevante : OJE 2021, Bobonaro ezekuta ona 27.65%

Imajen Tatoli/Sergio da Cruz

Merkadu lokál Ilibole, lokaliza iha Suku Odomau, Aldeia Ana-hun, Postu Administrativu Maliana, Munisípiu Bobonaro. Maibé nia kondisaun infraestrutura harii de’it ho kalén-at sira no kalen ferrujen tuir negosiante-sira nia kbiit.

Produtu lokal ne’ebé fa’an iha merkadu Ilibole  maka hanesan, ai-farina, talas, lakeru, hudi, sabraka, pipinu, batar, baria, guava, ai-dila, inklui modo mutin, agriaun, tomate, fehuk-roupa no produtu lokál sira seluk tan.

Xefe Suku Januario hateten, durante ne’e negosiante sira fa’an sira-nia produtu lokál iha merkadu refere la seguru tanba iha tempu bailoro uma ne’ebé negosiante sira harii  sempre hetan ameasa husi anin.

“Hanesan lider komunitária, ha’u husu ba Governu atu prepara netik fatin seguru ba sira, atu nune’e sira bele hala’o atividade negósiu iha faini dignu,”  Janurio hateten ba Agência Tatoli iha merkadu produtu lokál Ilibole, Bobonaro, domingu ne’e.

Husu mós Governu atu instala liña eletrisidade no saneamentu atu asegura negosiante sira-nia sasán iha tempu kalan, tanba distánsia merkadu dook hosi komunidade sira nia uma.

Molok Governu aplika serka sanitaria iha  Munisipiu Bobonaro, rendimentu kada loron, bele hetan  $15 to’o $20, maibé iha situasaun ohin loron susar tebes tanba movimentu laiha.

Hosi sorin seluk, iha merkadu Ilibole, Maria Morais, informa agora ne’e sira arraska loos, sasán ne’ebé fa’an mós la folin. Kompara ho uluk karik loron ida bele hetan rendimentu $15-$20, maibé agora hetan de’it $2.00 mós difisil tebes.

Negosiante seluk, Agostinha de Jesus, triste tanba sira la hetan rendimentu. Nune’e difikulta tebes sira atu hetan rendimentu no kumpre obrigasaun atu devolve osan ne’ebé kréditu hosi instituisaun finanseira, hanesan Banku Nasional Komérsiu Timor-Leste (BNCTL), Tuba Rai Metin, Moris Rasik no Kaebauk.

Jornalista       : Sergio da Cruz

Editór             : Francisco Simões

HAKEREK NO HATÁN

Please enter your comment!
Please enter your name here