Ró-ahi KMP Tranship II atu atraka iha Portu Dili, sábadu (12/06). Imajen TATOLI/Antónia Gusmão.

DILI, 12 juñu 2021 (TATOLI)–Ministru Transporte no Komunikasaun (MTK), José Agustinho da Silva, husu ba tékniku ró-ahi KMP Tranship II, atu submete relatóriu ofisiál ho loloos.  

“Ha’u fó ona orientasaun ba tékniku sira, katak tenke hateten klaru iha relatóriu, tantu parte pozitivu no negativu, nune’e bele haree parte proporsionál no objetividade, labele dehan buat ladi’ak relata ida di’ak nian fali, ne’ebé ha’u hein relatóriu eskrita hosi ekipa tékniku sira, liliu kapitaun ró inklui tékniku timor-oan hosi Diresaun Nasionál Transporte Marítima ne’ebé mak akompaña,” Ministru José Agustinho, hateten, iha Portu Dili, sábadu ne’e.

Iha sesta (11/06), Primeiru-Ministru (PM), Taur Matan Ruak, ho delegasaun halo viajen traballu ba Ataúro ho ró-ahi KMP Tranship II, to’o iha portu Bikeli, Ataúro ró-ahi ne’e labele atraka tanba kestaun tékniku balun.

Notísia relevante: PM agradese ultrapasa difikuldade bá Ataúro ho ró-ahi Tranship II

Ministru dehan, maski seidauk simu relatóriu eskrita, maibé bazeia ba informasaun ne’ebé relata hosi tékniku no kapitaun ró rasik katak iha fatór rua mak difikulta atrakasaun ró ne’e.

“Ha’u simu informasaun verbál hosi kapitaun ró ne’e rasik inklui kapitaun ró-ahi Berlin Nakroma, ne’ebé ha’u orienta akompaña, katak akontesementu ne’e mosu tanba forsa natureza, katak velosidade anin entre 16-20 knot, entaun ida-ne’e difikulta tanba laloran boot. Aleinde ne’e, kondisaun infraestrutura ne’ebé ita bele dehan ladun favorese ona, katak fatin ne’ebé atu kesi tali ró, ba liu parte kotuk laiha,” governante ne’e esplika.

Kona-ba mákina ró nian avaria, MTK sei haree relatóriu maka bele identifika loloos motivu akontesimentu ne’e.

Tuir Ministru, situasaun ne’ebé akontese la’ós ba dahuluk maibé hanesan ró sira seluk hanesan ró-ahi Berlin Nakroma, ne’ebé enfrenta situasaun hanesan bainhira halo atrakasaun iha portu refere.

Nune’e, bainhira simu relatóriu hosi tékniku sira, MTK sei trata asuntu ne’e ho didi’ak no relata ba Primeiru-Ministru hodi deside hamutuk.

“Ida-ne’e kestaun seguransa, ne’ebé ita tenke haree asuntu ne’e ho di’ak, oinsá maka armoniza situasaun, tanba ne’e ha’u sei hasoru diretamente Primeiru-Ministru atu ko’alia,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here