Sekretáriu Jerál Federasaun Futeból Timor-Leste (FFTL), Nelio Isaac Sarmento. Imajen Tatoli/António Gonçalves

DILI, 04 juñu 2021 (TATOLI) – Sekretáriu Jerál Federasaun Futeból Timor-Leste (FFTL), Nelio Isaac Sarmento, husu ba Governu atu akompaña situasaun desportu hotu, liu-liu futeból atu nune’e bele apoiu selesaun nasionál sira atu ba partisipa iha eventu internasionál.

Notísia Relevante : Klube Cambodia lakohi sai uma-nain kontra Lalenok

“Agora ita-nia Governu mós tenke akompaña ita nia situasaun desportu iha rai laran atu fasilita ita-nia selesaun sira ba joga iha li’ur, ami komunika kada loron ho AFC kona-bá ita nia situasaun mai ita nia Governu mak tenke akompaña  nafatin, se Governu mak nune’e hela de’it ami labele halo buat ida,” Nelio  Isaac Sarmento hateten ba Agência Tatoli iha sede FFTL, Dili, sesta ne’e.

Nia dehan, bainhira Governu la tau preokupasaun mak bele fó ameasa boot ba ekipa nasionál atu la partisipa iha jogu internasionál sira hanesan Suzuki Cup ne’ebé sei halo tempu besik.

FFTL mós tenta nafatin komunika ho Governu haree ba situasaun desportu liu-liu futeból iha nasaun ne’e.

Relasiona ho asuntu no sujestaun FFTL nian ne’e Tatoli  tenta atu konfirma ho Sekretáriu Estadu Juventude no Desportu (SEJD) maibé sei okupadu ho servisu seluk.

Atividade FFTL iha serka sanitaria

FFTL hanesan membru ida hosi Federation International Football Asosiation (FIFA) no Asian Football Confederation (AFC), maibé iha situasaun serka sanitária nia laran sai difikuldade ba FFTL atu implementa nia atividade sira.

“Durante ne’e ita iha difikuldade tebes atu halo implementasaun atividade sira, tanba ita tenke kumpre ba regra sira estadu fó sai ona liu-liu iha konfinamentu obrigatóriu ne’e mak halo ami atu halibur jogadór sira labele,” Nelio Isaac Sarmento hateten.

Iha munisípiu hirak ne’ebé la tama iha serka sanitária kontinua implementa atividade FFTL nian hanesan fó formasaun hosi membru FFTL ba árbitru sira no seluk tan.

“Munisipiu sira ne’ebé laiha serka sanitaria sira nia atividade lokál sira lao nafatin. Atividade sira halo ne’e mak foku liubá formasaun árbitru-sira nian hanesan iha Manufahi ita fasilita fó treinamentu árbitru nian, ami nia ekipa iha ne’e balun ba tuir teste swab no trata dokumentu hodi sai hosi Dili ba iha ne’ebá hodi fó treinamentu ba maluk sira iha ne’ebá,” nia hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here