Primeiru-Ministru no Ministru Interiór, Taur Matan Ruak, no Embaixadora interina Austrália, Philippa Venning, ko’a vita nu’udár símbolu inaugurasaun postu UPM, iha suku Bikeli, Ataúro, sesta (11/06). Imajen TATOLI/Antónia Gusmão

ATAÚRO, 11 juñu 2021 (TATOLI)Primeiru-Ministru (PM) no Ministru Interiór, Taur Matan Ruak, akompaña hosi Komandante Jerál Polísia Nasionál Timor-Leste (PNTL), Komisáriu Faustino ds Costa no Embaixadora interina Austrália, Philippa Venning, inaugura postu Unidade Polísia Marítima (UPM), ne’ebé lokaliza iha aldeia Akrema, suku Bikeli, postu Ataúro, munisípiu Dili.

Biban ne’e, PM apresia no agradese apoia ne’e tanba bele ajuda di’ak liután prezensa PNTL iha Akrema.

“Ne’e postu dahuluk iha Akrema, ne’ebé prezensa PNTL ho postu foun ne’e la’ós atu impede atividade populasaun nian, maibé atu ajuda fasilita atividade populasaun nian di’ak liután iha futuru,” Xefe Governu hateten iha seremónia inaugarasaun postu UPM, iha suku Bikeli, sesta ne’e.

Notísia relevante: PM Taur sei vizita Ataúro

Postu ne’e konstrui hosi empreza Caltex no hetan apoia finanseira hosi Governu Austrália liuhosi parseiru dezenvolvimentu Timor-Leste Police Development Programme (TLPDP).

Delegasaun hosi Governu sentrál, autoridade lokál no komunidade sira partisipa iha seremónia inaugurasaun postu UPM iha suku Bikeli, Ataúro, sesta (11/06). Imajen TATOLI/Antónia Gusmão

Nune’e, atuál Ministru Interiór ne’e husu ba entidade seguransa iha postu Akrema atu koopera ho di’ak, ajuda rezolve problema komunidade nian, liliu kestaun seguransa.

“Husu mós ba UPM atu kuidadu didi’ak obra ne’e no halo manutensaun rutina, nune’e obra bele uza to’o tempu naruk,” nia akresenta.

Iha fatin hanesan, Embaixadora interina Austrália, Philippa Venning, sente haksolok tanba bele hamutuk ho Governu halo inaugrasaun ba postu UPM foun.

“Austrália urgullu apoia PNTL no Governu Timor-Leste hodi kontrui postu foun sira, inklui postu ida-ne’e liuhosi ami-nia progama Dezenvolvimentu Polísia Timor-Leste. Postu ne’ebé ami konstrui hamutuk neen, inklui ida inaugura tiha ona,” nia tenik.

Diplomata ne’e dehan, nu’udár nasaun amigu no viziñu, Austrália no Timor-Leste iha parseria forte no rekoñese katak fronteira seguru mak importante tebes.

“Seguransa fronteira importante ba seguransa nasionál nasaun no ba seguransa iha ita-nia rejiaun. Aleinde ne’e, seguransa fronteira mós importante ba reziliénsia dezenvolvimentu ekonomia Timor-Leste nian, liuliu iha fatin ne’e tanba Ataúro hanesan fatin turizmu importante tebes,” nia hatutan.

Aleinde ne’e, projesaun Timor-Leste nia rekursu naturál, fó mós prioridade ba UPM atu uza postu ne’e atu fiskaliza movimentu bero no ró-ahi, liuliu atividade peska ilegál ne’ebé kontra lei,” nia tenik.

Postu UPM ne’e kompleta ho fasilidade ba membru sira hodi hala’o serbisu inklui haris fatin no bee-moos.

Nune’e mós, Governu Austrália apoia finanseira ba konstrusaun postu seguransa no motorizada rua.

Seremónia ne’e partisipa hosi Vise-Ministru Interiór, António Armindo, Ministru Administrativu Estatál, Miguel Perreira de Carvalho, Espoza Xefe Governu, Isabel da Costa Ferreira, Konsileiru Másimu Partidu KHUNTO, José Naimori Bucar, ofisiál PNTL, Autoridade Ataúro inklui populasaun Akrema.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here