Illa Ataúro. Imajen/Espesiál

ATAÚRO, 11 juñu 2021 (TATOLI)–Primeiru-Ministru (PM), Taur Matan Ruak, husu ba Ataúro-oan sira atu prepara-an hodi simu responsabilidade boot iha tinan oin transforma postu ne’e sai munisípiu.

“Mudansa estatutu fó todan ba imi, ita kompara família ida karik oan mane no oan feto harii ketak uma-kain, kuandu hela hamutuk buat hotu laiha no depende inan-aman, hanesan mós Ataúro, kuandu hambriik mesak ahi mate, bee laiha no husu ita-nia an. Tanba ne’e, atu dezenvolve Ataúro, husu Ataúro-oan atu prepara-an, atu dezenvolve sai oinsá, ita la presiza buat barak no boot, maibé haree kiik uluk hanesan bee-moos, kondisaun eskola, no ahi tanba dala barak hakarak boot liu maibé iis la to’o,” PM apela bainhira halo diálogu ho komunidade iha postu administrativu Ataúro, munisípiu Dili, sesta ne’e.

Foin lalais ne’e, Parlamentu Nasionál (PN) aprova ona Proposta-Lei devizaun administrativa territóriu, nune’e Loré, Hatulia B sei sai postu administrativu foun no Ataúro ne’ebé antes ne’e tama munisípiu Dili hanesan postu, hamriik mesak hanesan munisípiu foun iha loron 01 janeiru 2022, maibé sei hein promulgasaum hosi Prezidente Repúblika.

Notísia relevante: PN aprova proposta-lei divizaun adminsitrativa territóriu iha finál globál

Xefe Governu haktuir, Ataúro nia atividade bele aumenta volume bazeia ba estatutu, tanba bainhira harii Oé-cusse, Ataúro hola parte sai zona ekonomia espesiál ida no momentu ne’ebá eis Primeiru-Ministru nu’udar Prezidente Autoridade, Marí Alkatiri, hamutuk ho tékniku sia halo aprezentasaun planu mestre Ataúro hodi dezenvolve, maibé ikus mai Oé-cusse hetan atensaun liu no Ataúro ladún, entaun VIII Governu deside muda illa ne’e tuir nia estatutu.

“Atu dezenvolve Ataúro sai di’ak liután ho estatutu foun ne’ebé sei mai, Ataúro-oan tenke unidade no buka rekursu hodi dezenvolve di’ak liu planu,” PM fó hanoin.

Governu no PN deside ona Ataúro iha estatutu ketak no daudaun ne’e Ministériu Administrasaun Estatál (MAE) halo esforsu maka’as atu hahú janeiru 2022, Ataúro sai ona munisípiu no iha orsamentu rasik.

Tinan 2014 legalmente Ataúro hanesan zona espesiál ekonomia

Iha fatin hanesan, Ministru Administrasaun Estatál, Miguel Perreira de Carvalho, dehan, dezenvolvimentu ekonomia espesiál Ataúro nian, legalmente hatuur ona iha tinan 2014, maibé ohin loron seidauk haree buat barak akontese iha Ataúro, tanba ne’e Governu hakarak Ataúro mós bele goza estatutu ekonomia apropriadu ida.

“Entaun tratamentu ekonómiku ne’e hahú ona no Governu sei haree forma ne’ebé maka di’ak liután, tanba VIII Governu hamutuk deside kria sirkunskrisaun administrativa foun iha territóriu Timor-Leste, ne’ebé harii Ataúro hanesan munisípiu mesak ida,” nia esklarese.

Prosesu tuir mai, Governu no PN hein hosi parte Prezidente Repúblika hodi halo promulgasaun ba Proposta-Lei devizaun administrativa territóriu.

“Hakarak hato’o ba Ataúro-oan hotu katak, tratamentu administrativa espesiál ne’e maka agora hahú halo. Hahú uluk kria munisípiu Ataúro hanesan sirkunskrisaun administrativa hanesan iha Liquiçá, maibé karik Liquiçá iha postu tolu, iha Ataúro ita dezeña iha de’it sirkunskrisaun administrativa eskalaun dahuluk ka munisípiu Ataúro de’it, laiha postu administrativu tanba tratamentu administrativu espesiál,” Ministru esplika.

Tuir governante ne’e karik tenke kumpre Lei devizaun administrativu territóriu, Ataúro la kumpre kritériu sira hodi sai munisípiu ida, tanba lei hateten atu sai munisípiu tenke área jeografia ne’e kilómetru kuadradu 300, abitante pelu menus tenke 30.000, maibé realidade abitante Ataúro foin besik 12.000.

“Maibé tanba kumpre tratamentu administrativa espesiál ne’e maka Estadu, Governu no Parlamentu hanoin katak tenke fó tratamentu espesiál ida-ne’e hodi kria sirkunskrisaun administrativa eskalaun dahuluk iha Ataúro,” nia hatutan.

Tanba ne’e, Ministru dehan, molok sai munisípiu ida, tenke hahú serbisu hamutuk ho Governu sentrál prepara kondisaun mínimu hodi tinan oin preparadu hanesan administrasaun munisipál ida.

“Fiar katak rekursu umanu mínimu tebes iha Ataúro, infraestrutura tantu área urbana no rurál mós tenke solusiona antes to’o janeiru. Entaun buat balun ne’ebé mak sei halo maka ita presiza prepara administrasaun munisipál Ataúro, katak presiza iha edifísiu apropriadu no planu atu iha orsamentu rasik,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here